کراچی (رپورٹنگ آن لائن)وزیر بلدیات سندھ سعید غنی نے کہا ہے کہ اس سال جشن آزادی یکم تا 14 اگست تک “مارکہ حق جشن آزادی” کے بینر تلے صوبے بھر میں شایان شان طریقے سے منایا جائے گا۔
سندھ حکومت کے تمام محکموں کی طرح محکمہ بلدیات کے تحت بھی صوبے بھر سینکڑوں کی تعداد میں تقریبات ڈسٹرکٹ، ٹان اور یوسی کی سطح پر منعقد کی جائیں گی۔ کراچی کے تمام ٹانز اور ان کے زیر انتظام یوسیز بھی ان تقریبات کو بھرپور انداز میں منانے کے حوالے سے تیاریاں شروع کردے۔ ان خیالات کا اظہار انہوں نے جمعرات کے روز پیپلز پارٹی کے کراچی کے ٹائونز کے چیئرمینز کا اہم اجلاس کی صدارت کرتے ہوئے کیا۔ اجلاس میں پیپلز پارٹی سے تعلق رکھنے والے 13 ٹائونز چیئرمینز شریک ہوئے۔
اجلاس میں یکم تا 14 اگست تک مارکہ حق اور یوم آزادی کی تقریبات کو شایان شان طریقے سے تمام ٹائونز میں منانے کے حوالے سے تفصیلی تبادلہ خیال ہوا۔ اس موقع پر صوبائی وزیر سعید غنی نے کہا کہ کراچی کے تمام ٹانز میں اس سال یکم تا 14 اگست تک یوم آزادی کو مارکہ حق اور یوم آزادی پاکستان کے طور پر منایا جارہا ہے۔ سندھ حکومت کے تمام محکمہ اس حوالے سے صوبے بھر میں سینکڑوں تقریبات کا انعقاد کررہی ہے۔ سعید غنی نے کہا کہ محکمہ بلدیات کے تحت بھی صوبے بھر میں متعدد پروگرام کا انعقاد کیا جارہا ہے اسی طرح کراچی میں بھی مارکہ حق یوم آزادی کی تقریبات ٹائونز اور یوسیز کی سطح پر منانے کے لئے تمام ٹائونز اپنے اپنے ٹائونز کی یوسیز کے اجلاس بلا کر اس میں پروگرام ترتیب دیں۔
سعید غنی نے کہا کہ ٹائونز اپنے زیر انتظام اور یوسیز اپنے زیر انتظام آنے والی گلی محلوں اور سڑکوں کو قومی پرچموں اور برقی قمقموں سے سجائیں۔ تمام بازاروں، مارکیٹوں اور کمرشل جگہوں کو بھی خوبصورتی سے سجایا جائے اور اس کے لئے ان کی تنظیموں اور ایسوسی ایشنز کے ساتھ مل کر پروگرام بنائیں جائیں۔ شہر بھر میں عوام میں پاکستانی پرچم تقسیم کئے جائیں، رکشہ ٹیکسیوں اور گاڑیوں پر جھنڈے لگائیں جائیں۔ سعید غنی نے ٹائونز چیئرمینز کو ہدایت دی کہ ہر ٹائون اپنی کونسلز کے اجلاس سے اس حوالے سے ایک مخصوص بجٹ منظور کروائے تاہم اس سے ترقیاتی کاموں کو کسی قسم کی رکاوٹ کا سامنا نہ کرنا پڑے۔
اسی طرح سجاوٹ اور جھنڈوں کے لئے بڑی بڑی کمپنیوں سے بات کرکے ان کے ناموں والے پاکستانی پرچم بنائیں جائیں۔ تمام ٹائونز کے چیئرمینز، وائس چیئرمینز اور منتخب نمائندے اپنے گھروں اور دفاتر کو بھی خوبصورتی سے سجائیں۔ سعید غنی نے مزید کہا کہ تمام ٹائونز اپنے اپنے ٹائونز میں کرکٹ، فٹ بال، ہاکی، والی بال، کبڈی، ملاکھڑے سمیت دیگر کھیلوں کے ٹورنامنٹ کا انعقاد کریں جس کو مارکہ حق یوم آزادی ٹورنامنٹ کا نام دیا جائے۔ قائد اعظم محمد علی جناح، علامہ اقبال اور دیگر پاکستان بنانے والوں کے نام سے کھیلوں کے ٹورنامنٹ کو منسوب کریں۔ پولیس، رینجرز اور پاک فوج کے شہدا کے ناموں سے تقریبات کا انعقاد کیا جائے اور اپنے اپنے ٹائونز میں ان شہدا کے گھروں اور ان کی قبروں پر حاضری کے لئے پروگرام مرتب کریں۔
سعید غنی نے تمام ٹائونز کے چیئرمینز کو ہدایات دیتے ہوئے کہا کہ تمام ٹائونز میں 14 روز تک تقریبات کے انعقاد کو یقینی بنائیم اور اس میں زیادہ سے زیادہ عوام کو شریک کرین ساتھ ہی اپنے اپنے ٹائونز میں بلڈ کیمپوں اور فری میڈیکل کیمپس لگائے جائیں ۔ سعید غنی نے کہا کہ ہم چاہتے ہیں کہ ماضی میں جس طرح صوبہ سندھ ہر محاذ پر دیگر صوبوں سے برتری حاصل کرتا رہا ہے اس سال مارکہ حق یوم آزادی کی تقریبات میں بھی دیگر شہروں اور صوبوں سے بازی لے جائے۔
انہوں نے تمام ٹائونز کو ہدایات دی کہ اپنے اپنے ٹائونز اور یوسیز میں اچھی دکانیں، مارکیٹیں، گھروں اور گاڑیوں کو سجانے والوں کے مابین مقابلہ کروا کر ان کو انعامات دئیے جائیں تاکہ عوام میں مزید جوش و جذبہ پیدا ہوسکے۔ سعید غنی نے بتایا کہ محکمہ اسپورٹس، کلچر، بلدیات، ایجوکیشن، صحت، محنت سمیت تمام محکموں کی جانب سے اس سال یوم آزادی کی تقریبات کے 14 یوم تک مختلف پروگرامز کئے جارہے ہیں۔
کراچی میں 13 اور 14 اگست کی شب نیشنل اسٹیڈیم کراچی میں عظیم الشان کنسرٹ کیا جائے گا جبکہ سکھر، حیدرآباد سمیت دیگر اضلاع میں بھی بڑی بڑی تقریبات کا انعقاد کیا جارہا ہے۔ سعید غنی نے کہا کہ 14 اگست کے دن تمام ٹائونز میں پرچم کشائی کی بڑی بڑی تقریبات کا انعقاد کیا جائے اور ان میں عوام کو شامل کیا جائے۔
