اسلام آ باد (رپورٹنگ آن لائن ) وفاقی وزیر برائے موسمیاتی تبدیلی شیری رحمان نے کہا ہے کہ ججز اور پولیس افسران کو دھمکیاں دینے کی روش قابل تشویش ہے۔ سماجی رابطے کی ویب سائٹ ٹوئٹر پر اپنے جاری کردہ ٹوئٹ میں وفاقی وزیر شیری رحمان نے کہا کہ خاتون سیشن جج کو دھمکی دینے کے خلاف اسلام آباد ہائی کورٹ کا نوٹس خوش آئند ہے ، ججز اور پولیس افسران کو دھمکیاں دینے کی روش قابل تشویش ہے۔
شیری رحمان نے کہا ان دھمکیوں کو سنجیدہ نا لیا گیا تو یہ رواج بن جائے گا، انصاف اور قانون نافذ کرنے والوں کو ہر کوئی ڈرانے دھمکانے کی کوشش کرے گا۔ انہوں نے کہا کہ شہید ذوالفقار علی بھٹو کا عدالتی قتل ہوا، شہید بی بی ساری زندگی عدالتوں کا سامنہ کرتی رہی لیکن کسی نے ججز کو دھمکیاں نہیں دی جبکہ یہ دو دن کے ریمانڈ پر جج کو دھمکی دے رہے۔
شیری رحمان کا کہنا تھا کہ عمران خان ساری عمر عدالتوں اور ادراوں کے لاڈلے رہے اس لئے اب خود کو قانون اور عدالتوں سے بالا سمجھتے ہیں، اپنے غلطی تسلیم کرنے بجائے تحریک انصاف کے رہنما اب بھی ملک بند کرنے کی دھمکیاں دے رہے ہیں۔ انہوں نے مزید کہا کہ یہ ملک جام کرنے کے منصوبا بھی بنا رہے اور گرفتاری کے ڈر سے چھپ بھی رہے ہیں۔
