لاہور (رپورٹنگ آن لائن )پاکستان کرکٹ ٹیم کے چیف سلیکٹر وہاب ریاض نے کہا ہے کہ چار سال سے ڈومیسٹک کرکٹ سے کسی کھلاڑی کو اْوپر نہیں آنے دیا گیا تاہم جب تک میں ہوں کسی کھلاڑی کے ساتھ ناانصافی نہیں ہو گی۔
ایک انٹرویومیں چیف سلیکٹر وہاب ریاض نے کہاکہ نئے سال میں کچھ اہداف مقرر کیے ہیں، ٹی ٹوئنٹی ورلڈکپ میں بہترین ٹیم کمبی نیشن بنانا ہدف ہے، مڈل آرڈر بیٹنگ کے ایشوز کو حل کرنا بھی اہداف میں شامل ہے۔انہوںنے کہاکہ بابر اور رضوان کے سوا کوئی بھی تسلسل سے پرفارم نہیں کر رہا، چار سال سے ڈومیسٹک کرکٹ سے کسی کھلاڑی کو اْوپر نہیں آنے دیا گیا،
کوشش ہے ماضی میں کھلاڑیوں کے ساتھ جو ناانصافیاں ہوئیں وہ نہ ہوں، جب تک میں ہوں کسی کھلاڑی کے ساتھ ناانصافی نہیں ہو گی۔وہاب ریاض نے کہاکہ کسی ایک فارمیٹ میں ناکام کھلاڑ ی کو مکمل باہر نہیں کریں گے، کھلاڑی جس فارمیٹ میں ناکام ہوگا اْسیاسی فارمیٹ سے ڈراپ کریں گے۔
وہاب ریاض نے کہا کہ شاہین آفریدی نے 307 دن کرکٹ کھیلی اْن کی رفتار میں کمی آئی، دیگر بولرز فٹنس مسائل کی وجہ سے اپنی رفتار کھو رہے ہیں، نسیم شاہ فٹ ہو گئے ہیں اور انہوں نے بولنگ شروع کر دی ہے، محمد حسنین نے ٹی ٹوئنٹی سیریز کیلئے لگائے گئے کیمپ میں بولنگ کی، نسیم اور حسنین جلد ایکشن میں دکھائی دیں گے تاہم فاسٹ بولر احسان اللہ کو ابھی فٹ ہونے میں وقت لگے گا۔
