ٹوکیو ( ر پورٹنگ آن لائن)جاپان کے وزیراعظم کِشیدا فومیو نے ایرانی صدر ابراہیم رئیسی سے ٹیلیفونک گفتگو کرتے ہوئے کہا ہے کہ وہ 2015 کے ایران کے جوہری سمجھوتے پر تمام فریقوں کی جلد واپسی کیلئے پرامید ہیں۔میڈیارپورٹس کے مطابق کشیدا نے رئیسی کے ساتھ ٹیلیفون پر تقریبا آدھے گھنٹے گفتگو کی۔ یہ کشیدا کے گزشتہ اکتوبر میں وزارتِ عظمی کا منصب سنبھالنے کے بعد ایرانی صدر کے ساتھ پہلی بات چیت تھی۔جوہری سمجھوتے کی بحالی کے لیے امریکا اور ایران کے مابین بالواسطہ مذاکرات دوبارہ شروع ہونے پر دونوں رہنمائوں نے تبادلہ خیال کیا۔
امریکا کے سابق صدر ڈونلڈ ٹرمپ کی جانب سے مذکورہ سمجھوتے سے یکطرفہ طور 2018 میں دستبرداری کے بعد امریکا اور ایران، یورپی یونین کی ثالثی میں مذاکرات کا انعقاد کرتے رہے ہیں۔ امریکی دستبرداری کے بعد سے ایران نے اپنی جوہری ترقی کی رفتار بڑھا دی ہے۔وزیراعظم کشیدا نے زور دیا کہ جاپان نے تسلسل سے 2015 کے سمجھوتے کی حمایت کی ۔دونوں رہنمائوں نے قریبی رابطے میں رہنے پر اتفاق کیا۔ انہوں نے یمن میں خانہ جنگی سمیت مشرقِ وسطی کی صورتحال پر بھی تبادلہ خیال کیا۔
