کراچی(رپورٹنگ آن لائن) وفاقی اور صوبائی حکومتوں کی جانب سے پروموشن پالیسی کے تحت امتحانات کے بغیر میٹرک اور انٹرمیڈیٹ کی سطح پر طلبہ کو براہ راست پاس کرنے کے پیچیدہ اور گھمبیر نتائج آنا شروع ہوگئے ہیں،جامعہ کراچی تحت داخلوں کے سلسلے میں لیے گئے انٹری ٹیسٹ میں ماسٹرز پروگرام میں 89 فیصد جبکہ بیچلر پروگرام میں 71 فیصد امیدوار ناکام ہوگئے۔
تفصیلات کے مطابق پاکستان میڈیکل کمیشن(پی ایم سی)نے میڈیکل کالجوں کے انٹری ٹیسٹ(ایم ڈی کیٹ 2020)کے نتائج طلبا کی شکایات کے ازالہ کے بعد ایک بار پھر جاری کر دیئے۔طلبہ کی جانب سے نتائج میں غلطیوں کے انکشاف کے بعد ایم ڈی کیٹ 2020 کے نتائج ویب سائٹ سے نتائج 30 گھنٹے کے لیے ہٹا دیے گئے تھے۔ترجمان پی ایم سی کے مطابق ایم ڈی کیٹ کے نتائج پہلے 16 دسمبر کی شام جاری کیے، طلبا کی شکایات پر نتائج 30 گھنٹے کے لیے ہٹا دیے گئے تھے، پی ایم سی نے طلبا کی شکایات کے ازالہ کے بعد نتائج ایک بار پھر جاری کیے۔
ترجمان کے مطابق 29 نومبر کو امتحان دینے والے طلبا کو 14 نمبر اضافی دے دیے گئے ہیں جبکہ 13 دسمبر کے امتحان میں شریک طلبا کو 7 اضافی نمبر دیے گئے۔ترجمان پی ایم سی نے کہا کہ طلبا کو اضافی نمبر امتحان میں 14 سوالات آوٹ سلیبس ہونے پر دیے گئے۔دوسری جانب طلبہ کا کہنا ہے کہ پاکستان میڈیکل کمیشن کی میڈیکل کالجز کے داخلہ امتحانات میں بے قاعدگیاں ہوئیں، پی ایم سی ناکام ادارہ ہے، یہ نہ پیپر بنا سکتے ہیں نہ ہی نتائج کا اعلان صحیح طور پر کیا۔طلبا نے موقف اختیار کیا کہ امتحانات میں کئی سوالات آوٹ آف سلیبس تھے، طلبا و طالبات کے نام تک نتائج کے سرٹیفکیٹ پر غلط جاری کیے گئے۔ ذرائع کے مطابق ماسٹرز پروگرام کے لیے منعقدہ انٹری ٹیسٹ میں 503 امیدواروں میں سے صرف 20 فیصد یعنی 104 امیدواروں نے یہ ٹیسٹ پاس کیا باقی 396 امیدوار فیل ہوگئے، ماسٹرز پروگرام کے لیے منعقدہ انٹری ٹیسٹ 6 مختلف شعبوں کی 355 نشستوں کے لیے تھا۔دوسری جانب بیچلر پروگرام کے لیے انٹری ٹیسٹ 20 مختلف شعبوں میں 1467 مختص نشستوں کے لیے لیا گیا تھا جس میں 8983 امیدوار شریک ہوئے تھے جس میں سے 2605 یعنی 29 فیصد امیدواروں نے یہ ٹیسٹ پاس کیا اور 6378 امیدوار فیل ہوگئی واضح رہے کہ جامعہ کراچی کی جانب سے ٹیسٹ کے پاسنگ مارکس 100 میں سے 50 نمبر مقرر کیے گئے ،
ذرائع کے مطابق صرف ویژول اسٹڈیز کے ٹیسٹ میں شریک 1118 امیدواروں میں سے 600 سے زائد امیدوار پاس ہوئے ہیں۔بیچلر اور ماسٹرز پروگرام کے انٹری ٹیسٹ کے نتائج کی تفصیلات کے مطابق ٹیسٹ میں کوئی بھی امیدوار 90 مارکس سے زائد حاصل نہیں کرسکا جبکہ 2 امیدوار ایسے بھی ہیں جن کے مارکس صفر ہیں صرف 14 امیدواروں نے 81 سے 90 مارکس حاصل کیے، 184 امیدوار ایسے ہیں جنھوں نے 71 سے 80 مارکس حاصل کیے ، 742 امیدواروں نے 61 سے 70 مارکس حاصل کیے ہیں۔پاس ہونے والے 1771 امیدوار ایسے ہیں جن کے مارکس 51 سے 60 کے درمیان ہیں جبکہ 41 سے 50 مارکس لینے والے امیدواروں میں 3051 اور 31 سے 40 مارکس لینے والوں میں 3375 امیدوار شامل ہیں اسی طرح 21 سے 30 مارکس لینے والے امیدواروں میں 1321 اور 11 سے 20 مارکس حاصل کرنے والے امیدواروں میں 117 جبکہ 1 سے 10 تک مارکس لینے والوں میں 16 امیدوار شامل ہیں۔
