اسلام آباد (رپورٹنگ آن لائن) پاکستان مسلم لیگ (ن) کے صدر اور قائد حزب اختلاف شہبازشریف نے کہاہے کہ تعلیم کو قومی سلامتی اور ترقی کا حصہ بنانا ہوگا، قومی ترجیحات میں اول نمبر ہونا چاہیے۔
عالمی یوم خواندگی پر اپنے بیان میں انہوں نے کہاکہ تعلیم کو قومی سلامتی اور ترقی کا حصہ بنانا ہوگا، قومی ترجیحات میں اول نمبر ہونا چاہئے،
دنیا علم وآگہی سے نئی رفعتوں سے ہمکنار ہورہی ہے، ہمیں بھی اپنا مقام حاصل کرنا ہوگا ۔
انہوں نے کہاکہ نوجوان آبادی والے ملک کے طورپر تعلیم ہمارے لئے زندگی اور موت سی اہمیت رکھتی ہے ،وزیراعظم نوازشریف کی قیادت میں پاکستان مسلم لیگ (ن) نے اپنے دور میں تعلیم کے فروغ کے لئے تاریخی اقدامات کئے ۔
انہوں نے کہاکہ پنجاب ایجوکیشن فنڈ (پی ای ایف) کے ذریعے 22 لاکھ بچوں کومعیاری تعلیم کی سہولت فراہم کی گئی ،ترقی اور تعلیم کے حصول کی واحد راہ قوم کو تعلیم یافتہ بنانا ہے،
پنجاب حکومت نے 4500سکولوں میں طالب علموں کی تعداد کو دوگنا کیا ،اسی ہزار نئے اساتذہ کو بھرتی کیا جن میں پچاس فیصد خواتین اساتذہ تھیں،پہلی بار پنجاب میں تعلیم کو الیکڑانک اورآئی ٹی بیس بنایا ،پہلی بار اساتذہ کے لئے میرٹ کی پالیسی اختیار کی گئی، تربیت کا پروگرام وضع کیاگیا ،
مانیٹرنگ آف سکولز کے نظام کے ذریعے تعلیم وتربیت کے معیارات کو یقینی بنایا گیا ،پہلی بار طالب علموں کے لئے لیپ ٹاپ سکیم شروع کی گئی،ذہین، محنتی اور غریب طالب علموں کے لئے وظائف اور بیرون ملک تعلیم کے پروگرام شروع کئے گئے ،
پاکستان مسلم لیگ (ن) حکومت نے تعلیمی نظام کو جدید خطوط پر استوارکیا ،پنجاب حکومت نے نصاب کو ڈیجیٹل کیا،پورے پنجاب میں نئے سکول اور تعلیمی درسگاہوں کا جال بچھایا گیا ،
پرائیویٹ سکولوں کے ساتھ اشتراک کرکے تعلیمی معیار کو بلند کیاگیا ،پسماندہ علاقوں میں تعلیم کے فروغ کے لئے دانش سکول جیسے انقلابی منصوبے شروع کئے گئے.
