لاہور(رپورٹنگ آن لائن)وزیر اعلی پنجاب چوہدری پرویز الہی نے دوست مزاری کے خلاف تحریک عدم اعتماد کی کامیابی پر کہا ہے کہ اپوزیشن کو پہلے کی طرح ایک اور شکست کا سامنا کرنا پڑا، ہفتہ کو ایک بیان میں پرویز الہی نے کہا کہ پاکستان تحریک انصاف اور ق لیگ کے ارکان اسمبلی کو خراج تحسین پیش کرتا ہوں،
انہوں نے کہا کہ تحریک عدم اعتماد کی کامیابی سیاسی وفاداریاں بیچنے والوں کے لیے کھلا پیغام ہے،چوہدری پرویز الہی کا کہنا تھا کہ سابق ڈپٹی اسپیکر نے جمہوری اقدار اور ایوان کے اعتماد کو پامال کیا، جس نے ایوان کی بے توقیری کی، ایوان نے اسے آئینہ دکھا دیا،وزیر اعلی پنجاب کا کہنا تھا کہ اپوزیشن کو اس طرح کے سرپرائز آئندہ بھی ملتے رہیں گے، اپوزیشن وہی کاٹ رہی ہے جو اس نے بویا۔
