نارووال (رپورٹنگ آن لائن)وفاقی وزیر منصوبہ بندی وترقی احسن اقبال نے کہا ہے کہ تحریک انصاف نے اپنے چار سالہ دور حکومت میں پاکستان کا بیڑہ غرق کیا اور نفرت کا سودا بیجا،2018کے الیکشن کے بعد عمران خاں نے سی پیک کے ذریعے بننے والے منصوبوں پر کرپشن کا الزام لگایا جس پر چین نے اپنا سرمایہ اٹھایا اور ایران اور انڈیا لے گیا۔
ظفروال کے نواحی گائوں میلووال میں خطاب کرتے ہوئے انہوں نے کہا کہ ہم نے ظفروال کے الیکشن میں ایک مشن کے تحت حصہ لیا تھا،ہم امن تعلیم اور ترقی کے ایک ایک لفظ پر پہرا دے رہے ہیں،میں الیکشن میں کہتا رہا ہوں جس طرح ایک اناڑی کبھی موٹر سائیکل نہیں چلا سکتا اسی طرح ایک اناڑی کو ملک کی چابی دی وہ ملک کو تباہی کے دہانے پر لے آیا، 2013سے پہلے پاکستان کے اپنے سرمایہ دار بھی پاکستان میں پیسہ لگانے کے لئے تیار نہیں تھے تب ہمارے ہمسائے ملک چین نے پاکستان میں سرمایہ کاری کی ،2018کے الیکشن کے بعد عمران خاں نے سی پیک کے ذریعے بننے والے منصوبوں پر کرپشن کا الزام لگایالہٰذاچین نے اپنا سرمایہ اٹھایا اور ایران اور انڈیا لے گیا۔
انہوں نے کہا کہ بانی پی ٹی آئی نے اپنے چار سال کے دور حکومت میں پاکستان کا بیڑہ غرق کیا،آج اپنے انٹرویو میں کہہ رہا ہے کے مجھے ایک پنجرے میں قید رکھا ہے جہاں قتل کے مجرموں یا دہشتگردوں کو رکھا جاتا ہے ،یہ وہی پنجرہ ہے جہاں آپ نے مجھے قید کیا تھا مگر میں نے کبھی باہر نکل کر شور نہیں مچایا بلکہ پینٹ کوٹ پہن کر سج دھج کر نیب کی عدالتوں میں پیش ہوتا رہا ہوں کیونکہ مجھے پتہ تھا کے میں بے گناہ ہوں جس کی گواہی آج تمہارا شہزاد اکبر اور فواد چوہدری دے رہے ہیں کے احسن اقبال پر الزام بے بنیاد تھے۔انہوں نے کہا کیا آپ نے عمران خاں کی کسی میں سنا کے اس نے کوئی بڑا منصوبہ بنایا
کوئی ڈیم بنایا کوئی بجلی کا کارخانہ بنایا اسنے صرف نفرت کا سودا بیچا جس کا نشانہ میں بھی بنا ،آج پی ٹی آئی کے لوگ اداروں کے خلاف سوشل میڈیا پر جو پراپیگنڈہ کر رہے ہیں ایسا پراپیگنڈہ تو انڈیا کی ایجنسی را بھی نہ کرسکی ،یہ ملک کو کھوکھلا کر کے ایٹمی طاقت کا سودا کرنا چاہتے ہیں۔
