راولپنڈی (رپورٹنگ آن لائن)ڈائریکٹر جنرل انٹر سروسز پبلک ریلیشن لیفٹیننٹ جنرل احمد شریف چوہدری نے کہا ہے کہ بھارت نے پاکستان میں 3 ائیر بیسز نور خان، مرید اور شورکوٹ پر میزائل داغے ہیں تاہم پاک فضائیہ کے تمام اثاثے محفوظ ہیں، اپنے عوام کی حفاظت کیلئے کسی بھی حد تک جائیں گے جبکہ پاکستانی ائیر بیسز پر بھارتی میزائل حملوں کے بعد پاکستان کی بھارت کے خلاف جوابی کارروائی شروع کردی ہے.
اس وقت پاکستان کی بھارت کے خلاف جوابی کارروائی جاری ہے اور اس وقت بھارت میں متعدد اہداف کو نشانہ بنایا جا رہا ہے۔ترجمان پاک فوج لیفٹیننٹ جنرل احمد شریف نے رات گئے پریس بریفنگ میں بتایا کہ بھارت کی جانب سے آدم پور سے 6 بیلسٹک میزائل فائر کیے گئے ہیں جن میں سے ایک میزائل آدم پور میں ہی گرگیا اور 5 امرتسر میں گرے ہیں۔ڈی جی آئی ایس پی آر نے کہا کہ بھارت اپنی ہی آبادی کو بیلسٹک میزائلوں سے نشانہ بنارہا ہے اور بھارتی پنجاب میں سکھوں کی آبادی کو نشانہ بنارہا ہے۔
انہوںنے کہاکہ ہماری ہمدردیاں بھارت کی اندرونی سازش کا شکار اقلیتوں کے ساتھ ہیں، بھارت بدحواسی میں اپنے ہی شہریوں کو نشانہ بنارہی ہے۔انہوں نے کہا کہ ہم ہرقسم کی دہشت گردی کی مذمت کرتے ہیں۔سیکیورٹی ذرائع نے بتایا ہے کہ بھارت اپنے ہی لوگوں پر میزائل فائل کرکے مزید جارحیت کا جواز چاہتا ہے اور وہ دنیا کو یہ جھوٹ بیچنا چاہتا ہے کہ پاکستان میزائل فائر کررہا ہے۔
ذرائع کے مطابق پاکستان کے پاس اپنے دعوے کا الیکٹرونک ثبوت موجود ہے، بھارت سکھوں کو نشانہ بناکر پاکستان کے خلاف نفرت پیدا کرنا چاہتا ہے جب کہ بھارت نے 7 اور 8 مئی کی رات بھی امر تسر پر 3 میزائل فائر کیے تھے۔بعد ازاں ترجمان پاک فوج ایک بار پھر بتایا کہ بھارت نے اب سے کچھ دیر قبل اپنے طیاروں سے فضا سے زمین پر میزائل داغے ہیں، نور خان بیس، مرید بیس اور شورکوٹ کو نشانہ بنایا گیا ہے۔
انہوںنے کہاکہ اب تک کے اطلاعات کے مطابق ایئرفورس کے تمام طیارے اور اثاثے محفوظ ہیں۔لیفٹیننٹ جنرل احمد شریف چوہدری نے کہا کہ بھارت نے افغانستان میں بھی میزائل داغے ہیں اور ڈرونز کا حملہ بھی افغانستان پر کیا ہے، بھارت اپنے پاگل پن اور جارحیت اور مکاری کے ذریعے پورے خطے کو ایک خطرناک جنگ کی طرف دھکیل رہا ہے۔انہوںنے کہاکہ ہم صرف یہ کہنا چاہتے ہیں، ہم تمہاری طاقت، تمہاری مکاری اور جارحیت سے مرعوب ہونے والی قوم نہیں ہیں، اب تم صرف ہمارے جواب کا انتظار کرو۔
ڈی جی آئی ایس پی آر نے کہا کہ بھارت کی جانب سے پی ایف ایئر بیسز پر داغے گئے میزائلوں کو ایئر ڈیفنس سسٹم نے ناکام بنایا جب کہ پاکستان کے پاس میزائل حملوں کے الیکٹرونک شواہد موجود ہیں کہ یہ میزائل کہاں سے داغے گئے۔انہوںنے کہاکہ افغانستان پر جو میزائل حملے اور ڈرون حملے کیے گئے تھے، ان کی لانچ بھارت نے انڈین پنجاب کے حملوں کے فورا بعد کیے جس سے معلوم ہوتا ہے کہ بھارت کا کوئی بڑا منصوبہ ہے تاکہ خطے میں عدم توازن پیدا کیا جائے اور خطے کو جنگ کی طرف دھکیلا جائے۔
لیفٹیننٹ جنرل احمد شریف چوہدری نے کہا کہ ہندوستان کی بڑھتی ہوئی جارحیت اور ہر بزدلانہ حملے کو ناکام بنایا جارہا ہے اور یہ حملے قطعاً پاکستانی عوام کے حوصلوں کو پست نہیں کرسکتے، بجائے اس کے کہ یہ حوصلے کم ہو، یہ بھارتی جارحیت کے ساتھ مزید بڑھ رہے ہیں۔
انہوںنے کہاکہ پاکستان کے بہادر اور غیور عوام کے حوصلے دیکھنے ہوں تو اس وقت راولپنڈی میں دیکھیں کہ کس طرح عوام بڑی تعداد میں پاک فوج کی حمایت میں سڑکوں پر نکل آئی ہے، پاک فوج ہمہ وقت وطن کے دفاع کے لیے تیار ہے۔انہوںنے کہاکہ ہم صرف یہ کہنا چاہتے ہیں، ہم تمہاری طاقت، تمہاری مکاری اور جارحیت سے مرعوب ہونے والی قوم نہیں ہیں، اب تم صرف ہمارے جواب کا انتظار کرو۔
