اسلام آباد(رپورٹنگ آن لائن)قائم مقام صدر سید یوسف رضا گیلانی نے اس بات پر زور دیا ہے کہ بچوں کی تعلیم، صحت، تحفظ اور فلاح و بہبود ریاست اور معاشرے کی اولین ترجیحات میں شامل ہونی چاہئیں۔جمعرات کو ایوان صدر کے پریس ونگ کے مطابق ان خیالات کا اظہار انہوں نے بچوں کے عالمی دن کے موقع پر اپنے پیغام میں کیا۔ انہوں نے کہا کہ بچے کسی بھی قوم کا قیمتی سرمایہ اور روشن مستقبل کی امید ہوتے ہیں۔
قائم مقام صدر نے کہا کہ حکومت بچوں کے بہتر مستقبل کے لیے ہرممکن اقدامات کررہی ہے جن میں قانون سازی، ادارہ جاتی اصلاحات اور پالیسی سطح پر اہم پیش رفت شامل ہے۔ انہوں نے کہا کہ مختلف پارلیمانی فورمز بچوں کے حقوق کے تحفظ اور ان کی فلاح کے لیے فعال کردار ادا کر رہے ہیں۔ سید یوسف رضا گیلانی نے اس امر پر بھی زور دیا کہ بچوں کی تربیت ایک مشترکہ ذمہ داری ہے جس میں والدین، اساتذہ، تعلیمی ادارے اور سماج سب کو اپنا کردار موثر طور پر ادا کرنا ہوگا۔
انہوں نے کہا کہ محفوظ، تعلیم یافتہ اور بااعتماد بچے ہی پاکستان کے مضبوط اور روشن مستقبل کی ضمانت ہیں۔ قائم مقام صدر نے یقین دلایا کہ ریاست بچوں کے حقوق کے مکمل تحفظ اور ان کی فلاح کو یقینی بنانے کے لیے ہر ممکن اقدامات جاری رکھے ہوئے ہے اور اس حوالے سے کوششوں میں مزید بہتری لائی جا رہی ہے۔
