اسلام آباد (رپورٹنگ آن لائن)پاکستان کرکٹ ٹیم کے سابق کپتان اور ٹیسٹ کرکٹر محمد یوسف نے بنگلادیش کے معاملے پر انٹرنیشنل کرکٹ کونسل پر شدید تنقید کرتے ہوئے کہاہے کہ سیکیورٹی خدشات حل نہ ہونے پر کرکٹ سے محبت کرنے والی قوم بنگلا دیش کو کرکٹ سے محروم دیکھنا انتہائی افسوس ناک ہے۔آئی سی سی کی جانب سے بنگلادیش کو ٹی 20 ورلڈ کپ 2026ء سے باہر کرنے کے معاملے پر محمد یوسف نے کہاکہ سیکیورٹی خدشات حل نہ ہونے پر کرکٹ سے محبت کرنے والی قوم بنگلا دیش کو کرکٹ سے محروم دیکھنا انتہائی افسوس ناک ہے۔
پاکستانی ٹیم کے سابق کپتان نے کہا کہ ماضی میں جب ایسے ہی خدشات سامنے آئے تو نیوٹرل وینیو کی منظوری دی گئی، کسی ایک ملک کے لیے اصول نہیں بدل سکتے۔انہوںنے کہاکہ آئی سی سی کو انٹرنیشنل کرکٹ کونسل کے طور پر کردار ادا کرنا چاہیے، جو کسی ایک بورڈ کے مفادات کا تحفظ کرتا ہوا نظر نہ آئے، انصاف اور یکساں معیار ہی عالمی کرکٹ کی اصل بنیاد ہیں۔
