اسلام آباد (رپورٹنگ آن لائن)وفاقی وزیر برائے داخلہ محسن نقوی نے بنوں میں بھارتی سپانسرڈ دہشتگردوں کے خلاف کامیاب آپریشن میں 22 دہشتگردوں کو جہنم واصل کرنے پر سکیورٹی فورسز کو زبردست خراجِ تحسین پیش کرتے ہوئے کہاہے کہ خیبرپختونخوا میں فتنہ الہندوستان کے ناسور کے خاتمے کے لیے فورسز کی مسلسل اور کامیاب کارروائیاں قابلِ فخر ہیں۔
اپنے بیان میں محسن نقوی نے کہا کہ سکیورٹی فورسز نے ایک بار پھر بروقت اور مؤثر کارروائی کرتے ہوئے دہشتگردوں کے مذموم عزائم کو ناکام بنا دیا، خیبرپختونخوا میں فتنہ الہندوستان کے ناسور کے خاتمے کے لیے فورسز کی مسلسل اور کامیاب کارروائیاں قابلِ فخر ہیں۔
انہوں نے کہا کہ قوم کی حمایت سے پاکستان سے فتنہ الہندوستان کے ناپاک وجود کا مکمل صفایا کیا جا رہا ہے اور ان کے سہولت کاروں کو کہیں بھی چھپنے نہیں دیا جائے گا۔ محسن نقوی نے کہا کہ پوری قوم کو اپنی بہادر سکیورٹی فورسز پر فخر ہے اور وہ ملک کے دفاع کے لیے ہر قربانی دینے کو تیار ہیں۔
