کوئٹہ(رپورٹنگ آن لائن)نئے سال کے آغاز پر بلوچستان میں خواتین اور طالبات کے لیے پنک بس سروس کا باقاعدہ آغاز کر دیا گیا ہے۔ وزیر اعلیٰ بلوچستان میر سرفراز بگٹی کا کہنا ہے کہ اس سروس کا مقصد خواتین اور طالبات کی روزمرہ آمد و رفت کو محفوظ، باوقار اور آسان بنانا ہے۔
وزیر اعلیٰ نے کہا کہ صوبائی حکومت کی ترجیح ہے کہ پنک بس سروس کو مستقل بنیادوں پر جاری رکھا جائے تاکہ زیادہ سے زیادہ خواتین اس سہولت سے مستفید ہو سکیں۔ انہوں نے بتایا کہ آئندہ مرحلے میں پنک بس سروس کا دائرہ کار دیگر اضلاع تک بھی پھیلایا جائے گا۔
میر سرفراز بگٹی کے مطابق پنک بس سروس کے ذریعے خواتین کو تعلیم، روزگار اور صحت کی سہولیات تک بہتر اور آسان رسائی حاصل ہو گی۔ انہوں نے مزید کہا کہ خواتین کے لیے محفوظ ٹرانسپورٹ نظام فراہم کرنا صوبائی حکومت کے اصلاحاتی ایجنڈے کا ایک اہم حصہ ہے۔
وزیر اعلیٰ بلوچستان نے سماجی رابطے کی سائٹ ایکس پر اپنے پیغام میں کہا کہ صوبے میں خواتین کو بااختیار بنانے کے لیے عملی اقدامات کا سلسلہ جاری ہے اور پنک بس سروس اسی سمت ایک اہم قدم ہے۔
