اسلام آباد(رپورٹنگ آن لائن) وزیراعظم کے کوآرڈینیٹر برائے اطلاعات و خیبرپختونخوا امور اختیار ولی خان نے کہا ہے کہ بلوم برگ کی رپورٹ حکومت کی مؤثر معاشی پالیسیوں پر مہرِ تصدیق ہے اور پاکستان میں مہنگائی میں نمایاں کمی کو عالمی سطح پر تسلیم کیا جا رہا ہے۔
انہوں نے کہا کہ نومبر میں مہنگائی کی شرح 6.1 فیصد تھی جو دسمبر میں کم ہو کر 5.6 فیصد پر آ گئی، جو کہ حکومت کے لیے ایک بڑی کامیابی ہے۔ ان کے مطابق ملک میں قیمتوں کا استحکام معاشی نظم و ضبط میں بہتری کا واضح ثبوت ہے۔
اختیار ولی خان کا کہنا تھا کہ خوراک کی قیمتوں میں دباؤ میں نمایاں کمی آئی ہے اور فوڈ انفلیشن کم ہو کر 3.24 فیصد تک آ گئی ہے۔ مارکیٹ میں خوراک کی وافر دستیابی کے باعث عوام کو براہِ راست ریلیف مل رہا ہے۔
انہوں نے مزید کہا کہ اسٹیٹ بینک آف پاکستان نے پالیسی ریٹ کو تین سال کی کم ترین سطح پر لا کر صنعتوں کے لیے نئی راہیں کھول دی ہیں، جبکہ شرح سود میں 50 بیسس پوائنٹس کی کمی سے سرمایہ کاری کے نئے مواقع پیدا ہوں گے۔
وزیراعظم کے کوآرڈینیٹر نے کہا کہ مہنگائی میں کمی سے عوام کی قوتِ خرید میں بہتری آ رہی ہے اور بلوم برگ کی رپورٹ اس بات کا ثبوت ہے کہ حکومت درست معاشی سمت میں گامزن ہے۔ ان کے مطابق دسمبر کے اعداد و شمار اس بات کی علامت ہیں کہ حکومتی پالیسیوں کے ثمرات عوام تک پہنچنا شروع ہو گئے ہیں، جبکہ مستحکم مارکیٹ اور کم ہوتی مہنگائی سے عوامی ریلیف کے آثار مزید نمایاں ہوں گے۔
