اسلام آباد(رپورٹنگ آن لائن)وزیر اعظم کے معاون خصوصی برائے سیاسی روابط ڈاکٹر شہباز گل نے کہا ہے کہ کرپشن کے سوال پر بلاول کا چیخنا اور اداروں پر تنقید انکے چور ہونے کی نشانی ہے،بلاول اور انکے والد محترم کو کئے گئے کرپشن کا حساب دینا پڑے گا۔
ان خیالات کا اظہار انہوں نے بلاول بھٹو کی پریس کانفرنس کے ردعمل میں کیا ۔شہبازگل نے کہا ہے کہ ۔کسی نے اگر پاکستان کو لوٹنے والوں کے چہرے دیکھنے ہیں تو بلاول کے آس پاس APC میں دیکھ لیں،جب پرچی لیکر بچے خود کو چئیرمین کہنے لگے تو بھٹو کے نظریے کی یہ حالت ہوتی ہے،فرنٹ مین کی اصلاح آپ کے والد محترم نے دنیا میں متعارف کروائی،کرپشن کے بے تاج بادشاہ زرداری صاحب کے ہنر سے یقیناً آپ مستفید ہوئے ہیں،
بلیک میلنگ اور گندی سیاست فرزندِ زرداری کو ورثے میں ملی ہے،پرچی چیئرمین نے فیصل سخی بٹ اور ناصر خان کو پارک لین کیس میں بطورِ فرنٹ مین استعمال کیا، انور مجید، ڈاکٹر عاصم حتیٰ کہ ایان علی کو بطورِ فرنٹ مین استعمال کرنے والے کس منہ سے کرپشن کی بات کر رہے ہیں؟ خود کو پارٹی کا وراثتی چیئرمین کہلانے والا کبھی کرپشن کے ان کیسسز پر بھی بات کرے، پرچی چئیرمین کسی دن فالودے والے، ایان علی، پارک لین، جیسے کرپشن داستانوں پر بھی پریس کانفرنس کر کے دکھائے،بلاول زرداری سندھ عوام کے ساتھ پچھلے ساڑھے 12 سال سے ہونے والی زیادتی کا کب جواب دینگے۔
