پشاور(رپورٹنگ آن لائن)خیبرپختونخوا کے گورنر فیصل کریم کنڈی نے کہاہے کہ بشریٰ بی بی نے عمران خان کو بتایا صوبے میں میرجعفر اور میرصادق کون ہے،جس صوبائی اسمبلی میں پاک فوج کیخلاف قرارداد پاس ہو وہاں کیا ہوگا۔
وفاق المدارس العریبہ پاکستان کے سالانہ امتحانات کے دورے پر میڈیا سے گفتگو کرتے ہوئے انہوںنے کہاکہ سوچے سمجھے منصوبے کے تحت وزیراعلیٰ علی امین گنڈا پور نے سب کو سائیڈ لائن کیا،بانی پی ٹی آئی کی 14 سال کی سزا پر یہاں کوئی احتجاج نہیں ہوا،پی ٹی آئی اپنی صوبائی حکومت کے خلاف احتجاج کرنے جا رہی ہے، احتجاج ہوئے لیکن سرکاری لوگوں کے علاوہ کس نے حصہ نہیں لیا۔
انہوں نے کہاکہ صوبائی حکومت کا کام لوگوں کو تحفظ دینا ہے اور وہ اپنے ہی خلاف احتجاج کر رہے ہیں، اب دیکھنا یہ ہے کہ صوبائی حکومت پی ٹی آئی کے خلاف احتجاج میں کامیاب ہوتی ہے یا نہیں۔انہوںنے کہاکہ 500 ارب روپے کہاں خرچ ہوئے ہیں اس کا جواب ائیں بائیں شائیں کر رہے ہیں، قبائلی اضلاع کے پیسے آتے ہیں یہ اپنے دھرنوں اور عیاشیوں پر خرچ کرتے ہیں۔گورنر خیبرپختونخوا نے کہا کہ اسی لیے کمیٹی بنائی گئی ہے تو اس سے حکومت کو تکلیف ہو رہی ہے، اپنی جیب بھرنے کیلئے خط لکھنے کے بجائے صوبے کے امان و امان کیلئے لکھنا چائیے تھا۔
انہوںنے کہاکہ جب تک وفاق سے بات چیت نہ ہو تو افغانستان وفد نہیں بھیجنا چاہیے، افغانستان کو واضح پیغام ہے کہ ان کی سر زمین پاکستان کے خلاف استعمال ہو رہی ہے، مذاکرات برابری کی بنیاد پر ہونا چاہیے ہیں۔فیصل کریم کنڈی نے کہا کہ ہم نے آج تک سیکورٹی کو سنجیدہ نہیں لیا،کیا ہماری اسمبلی میں سیکورٹی پر کوئی بحث ہوئی ہے؟ جس صوبائی اسمبلی میں پاک فوج کے خلاف قرارداد پاس ہو وہاں کیا ہو گا، آن کیمرہ سیشن ہونا چاہیے جس میں تمام معاملات دیکھے جائیں۔
