اسلام آباد( رپورٹنگ آن لائن)اسپیکر قومی اسمبلی سردار ایاز صادق نے کہا ہے کہ برداشت، باہمی احترام اور رواداری ایک پُرامن، مضبوط اور مستحکم معاشرے کی بنیادی اقدار ہیں۔ عالمی یوم برداشت کے موقع پر اپنے خصوصی پیغام میں انہوں نے کہا کہ آج کے دور میں ہم آہنگی، مکالمے اور تعاون کے فروغ کے لیے برداشت کو اپنانا وقت کی اہم ترین ضرورت ہے۔
اسپیکر سردار ایاز صادق نے کہا کہ اختلاف رائے کا احترام ہی جمہوریت کا اصل حسن ہے اور اسی رویے کے ذریعے معاشرتی ہم آہنگی اور سیاسی استحکام کو فروغ دیا جاسکتا ہے۔انہوں نے کہا کہ پارلیمان ملک میں رواداری، برداشت، بھائی چارے اور باہمی احترام کے فروغ کے لیے پُرعزم ہے اور اس سلسلے میں تمام تر اقدامات کیے جا رہے ہیں۔انہوں نے کہا کہ نفرت، تعصب اور انتہا پسندی کے مقابلے کے لیے پوری قوم کا متحد ہونا ناگزیر ہے۔
حکومت اور اپوزیشن دونوں کو چاہیے کہ ملک و قوم کے وسیع تر مفاد میں مذاکرات، مشاورت اور تحمل پر مبنی رویوں کو فروغ دیتے ہوئے تمام مسائل کا حل بات چیت کے ذریعے تلاش کریں۔انہوں نے کہا کہ نوجوان نسل میں برداشت، تحمل، مثبت سوچ اور باہمی احترام کا فروغ وقت کی اہم ضرورت ہے تاکہ ایک پُرامن، مستحکم اور ترقی یافتہ پاکستان کی بنیاد رکھی جاسکے۔
سردار ایاز صادق نے کہا کہ اسلام امن، برداشت، بھائی چارے اور احترامِ انسانیت کا درس دیتا ہے اور انہی تعلیمات پر عمل پیرا ہو کر ہم معاشرتی انتشار، عدم برداشت اور شدت پسندی جیسے رویوں پر قابو پا سکتے ہیں۔انہوں نے اس امید کا اظہار کیا کہ بھائی چارے، ہم آہنگی اور باہمی احترام کے فروغ سے ہم ایک مضبوط، خوشحال اور ترقی یافتہ پاکستان کی جانب پیش قدمی جاری رکھیں گے۔
