شرقپور شریف (رپورٹنگ آن لائن)وفاقی وزیر صنعت و پیداوار رانا تنویر حسین نے کہا ہے کہ بانی پی ٹی آئی عمران خان اور ان کی اہلیہ کو سزا قانون کے مطابق ملی ہے، بانی پی ٹی آئی نے اپنی کابینہ کو دھوکہ دے کر تاریخ کی سب سے بڑی کرپشن کی، مذاکرات جمہوریت کا حسن ہیں،ہم چاہتے ہیں کہ تحریک انصاف ایوان میں بیٹھے لیکن اس میں کامیابی نظر نہیں آرہی ۔
میڈیا سے گفتگو کرتے ہوئے انہوں نے کہا کہ بانی پی ٹی آئی کے خمیر میں ہی مثبت سیاست نہیں ہے ،پی ٹی آئی این آر او کے لیے منتیں کررہی ہے، لیکن تحریک انصاف سے نہ ڈیل ہو گی نہ ڈھیل ہوگی۔ انہوں نے کہا کہ کرم ایجنسی کا مسئلہ تشویشناک ہے اس کا حل نکلنا چاہیے، کرم میں امن و امن قائم رکھنا صوبائی حکومت کی ذمہ داری ہے،امن و امن برقرار رکھنے کے لیے وفاقی حکومت خیبر پختوانخواہ حکومت کی مدد کرنے کو تیار ہے۔
انہوں نے کہا کہ وزیر اعظم رمضان میں عوام کے لیے جلد بڑے پیکج کا اعلان کریں گے۔انہوںنے کہاکہ یوٹیلٹی سٹورز کو پرائیوٹ کرنے یا پبلک پرائیوٹ پارٹنرشپ پر چلانے کی طرف جارہے ہیں۔ انہوںنے کہا کہ یورپ کشتی حادثہ میں پاکستانیوں کی اموات پر دکھ ہے، انسانی اسمگلنگ پر سخت قوانین بنارہے ہیں تاکہ آئندہ اس طرح کا افسوسناک حادثہ نہ ہو۔
