پشاور(این این آئی)پی ٹی آئی کور کمیٹی کی رکن مشال یوسفزئی نے دعویٰ کیاہے کہ انہیں بانی پی ٹی آئی نے سینیٹ الیکشن کیلئے کاغذات نامزدگی جمع کروانے کی ہدایت کی ہے۔
ذرائع کے مطابق پارٹی چیئرمین بیرسٹر گوہر کو ٹیلی فون کر کے مشال یوسفزئی نے کہا کہ انہیں بانی سے ہدایت ملی ہے کہ وہ سینیٹ الیکشن کیلیے کاغذات نامزدگی جمع کروائیں۔ذرائع کے مطابق مشال یوسفزئی نے کہا کہ بشریٰ بی بی سے اہلخانہ نے اڈیالہ جیل میں ملاقات کی ہے، انہوں نے بشریٰ بی بی کا پیغام مجھے پہنچا دیا جس کے مطابق بانی پی ٹی آئی کی ہدایت ہے کہ میں سینیٹ الیکشن کے لیے کاغذات جمع کرواؤں۔
ذرائع کے مطابق بیرسٹر گوہر نے مشال یوسفزئی کو فون پر جواب دیا کہ آپ کاغذات جمع کروالیں پھر دیکھ لیتے ہیں۔ذرائع نے بتایا کہ سینیٹ ٹکٹ سے متعلق مشال یوسفزئی نے عاطف خان اور دیگر پارٹی رہنماؤں سے بھی رابطہ کیا ہے۔دوسری جانب مشال یوسفزئی نے سینیٹ ٹکٹ کے معاملے پر مؤقف دینے سے گریز کیا ہے جبکہ چیئرمین پی ٹی آئی بیرسٹر گوہر نے کہا ہے کہ بانی پی ٹی آئی نے کسی کو بھی سینیٹ کا ٹکٹ دینے کا نہیں کہا۔
بیرسٹر گوہر نے کہاکہ مشال یوسفزئی نے مجھ سے رابطہ کیا، معاملے کو دیکھ رہا ہوں، سینیٹ کے لیے ٹکٹ کس کو دینا ہے بعد میں فیصلہ کیا جائے گا۔یاد رہے کہ خیبرپختونخوا میں سینیٹ انتخابات 21 جولائی کو ہو رہے ہیں۔
