لاہور( رپورٹنگ آن لائن) صوبائی وزیراطلاعات عظمی بخاری نے کہا ہے کہ بانی پی ٹی آئی اور بشری بی بی کو جیل میں کھانا نہ دینے کا بیان من گھڑت اور بے بنیاد ہے،دونوں میاں بیوی کو معمول کے مطابق ان کے کھانے پینے کے لوازمات مہیا کیے جارہے ہیں،جو شخص دوپہر 12بجے اٹھتا ہو وہ روزہ کیسے رکھ سکتا ہے۔
اپنے بیان میںانہوں نے کہاکہ بانی پی ٹی آئی کو ہفتے میں تین دن گوشت،سبزیاں ،دالیں ،چقندر کا جوس مل رہا ہے،بانی پی ٹی آئی کو کافی،اُبلے ہوئے انڈے اور خشک میوہ جات کھانے کو ملتے ہیں،بشری بی بی کا کھانے کو جو دل چاہتا وہ مہیا کیا جاتا ہے۔
انہوںنے کہاکہ پشاور میں بیٹھے ایک شخص کو خواب آئی ہے ان کے آ قا کو جیل میں کھانا نہیں مل رہا ،دو روز قبل ان کی جماعت کے ترجمان نے بھی بانی پی ٹی آئی کی بیماری سے متعلق جھوٹ بولا،کل پمز کے چار سینئر ڈاکٹروں کی ٹیم نے آدھا گھنٹہ ان کا تفصیلی طبی معائنہ کیا .
ڈاکٹروں نے بانی پی ٹی آئی کو مکمل صحت مند قرار دیا ہے۔ انہوںنے کہا کہ جب اس جماعت کے پاس کوئی کارڈ نہیں بچتا تو مظلومیت کارڈ اور ہمدردی کارڈ کھیلنا شروع کردیتے۔
