ممبئی (رپورٹنگ آن لائن)بالی وڈ کنگ شاہ رخ خان نے سلمان خان کو بہترین بھائی قرار دے دیا۔میڈیارپورٹ کے مطابق شاہ رخ خان کی جانب سے اپنی 60 ویں سالگرہ کے موقع پر مداحوں کے ساتھ سوال جواب کے سیشن کا انعقاد کیا گیا تھا۔جہاں سپر اسٹار کے مداحوں نےAskSRK #کا استعمال کرتے ہوئے شاہ رخ سے دلچسپ سوالات کیے۔
سیشن کے دوران وشوجیت پٹیل نامی صارف نے شاہ رخ سے سوال کیا کہ سلمان خان کیلئے ایک لفظ کہیے ۔اس کے جواب میں بالی وڈ کنگ نے دبنگ خان کو بہترین بھائی کہتے ہوئے ان سے محبت کا اظہار کیا۔بالی وڈ کے2 سپر اسٹارز کے درمیان دوستی کا سلسلہ 1995 میں فلم کرن ارجن کے دوران شروع ہوا جس کے بعد بالی وڈ خانز کی اس جوڑی کو کچھ کچھ ہوتا ہے اور ہم تمہارے ہیں صنم سمیت کئی کامیاب فلموں میں ایک ساتھ دیکھا گیا۔
بعد ازاں 2008 میں کترینہ کیف کی سالگرہ کی پارٹی میں ہونے والے جھگڑے کے بعد سلمان اور شاہ رخ ایک دوسرے سے ملنے سے گریز کرنے لگے تاہم ممبئی میں کانگریسی رہنما اور دونوں کے مشترکہ دوست مرحوم بابا صدیقی کی افطار پارٹی میں برسوں کے گِلے دور ہوئے اور بالی وڈ کے دو بڑے خان پھر دوست بن گئے ۔حال ہی میں سلمان خان کو شاہ رخ کے صاحبزادے آریان خان کی ڈیبیو نیٹ فلکس فلم دی بیڈز آف بالی وڈ میں بطور کیمو دیکھا گیا۔
