لاہور (رپورٹنگ آن لائن ) لاہور ہائیکورٹ نے سوشل میڈیا پلیٹ فارم ایکس کی بندش پر اٹارنی جنرل آف پاکستان کو ذاتی حیثیت میں طلب کرلیا۔
چیف جسٹس لاہور ہائی کورٹ مس عالیہ نیلم کی سربراہی میں 3رکنی بینچ نے سوشل میڈیا پلیٹ فارم ایکس (سابقہ ٹوئٹر)کی بندش کے خلاف حافظ شاکر محمود اعوان سمیت دیگر کی درخواستوں پر سماعت کی۔ دورانِ سماعت وفاقی حکومت کے وکیل نے عدالت کو بتایا کہ رپورٹ پیش کردی ہے۔
کون کون سا حکومتی ادارہ ایکس استعمال کررہا ہے، وہ بتا دیا ہے۔چیف جسٹس نے استفسار کیا کہ ان درخواستوں پر بھی اٹارنی جنرل پاکستان کو معاونت کے لیے طلب کررکھا ہے، جس پر وکیل نے بتایا کہ 17اپریل کو اٹارنی جنرل کو طلب کیا ہوا ہے، ان درخواستوں کو بھی 17اپریل کے لیے مقرر کیا جائے۔
جسٹس فاروق حیدر نے ریمارکس دیئے کہ اس کیس کی حساسیت کے پیش نظر ہم نے اٹارنی جنرل آف پاکستان کو بلوایا ہے۔ چیف جسٹس نے ہدایت کی کہ اٹارنی جنرل پاکستان تیاری کے ساتھ پیش ہوں اور تمام لیگل چیزوں پر روشنی ڈالیں۔بعد ازاں عدالت نے کیس کی مزید سماعت 17اپریل تک ملتوی کردی ۔
