کراچی (رپورٹنگ آن لائن) متحدہ قومی موومنٹ (ایم کیو ایم) پاکستان نے کراچی بچاؤ مہم شروع کرنے کا اعلان کر دیا۔
بہادرآباد میں ایم کیو ایم پاکستان کے مرکز پر پریس کانفرنس کرتے ہوئے ڈاکٹر فاروق ستار کا کہنا تھا کہ نیا سال بہت ساری توقعات لیکر آیا ہے، پاکستان نے تاریخی معرکہ مارا اور 6 سے 10 مئی ہماری تاریخ میں سنگ میل کی حیثیت رکھتی ہیں۔
انہوں نے کہا کہ اس کا کریڈٹ فیلڈ مارشل، افواج پاکستان اور حکومت کو جاتا ہے جبکہ اس وقت عوام افواج پاکستان کے ساتھ سیسہ پلائی ہوئی دیوار بن کر کھڑے رہے، 2026 میں اب معرکہ معیشت کی طرف جانا ہے۔
ان کا کہنا تھا کہ ملک کی بقا و سلامتی کراچی سے وابستہ ہے اور اگر ملک کو بچانا ہے تو کراچی کو بچانا ہے۔
فاروق ستار نے کہا کہ ایم کیو ایم کراچی بچاؤ مہم کے ذریعے اپنا حصہ ڈال رہی ہے، اس مہم کے تحت ایم کیو ایم کے وفود کراچی میں مختلف سیاسی جماعتوں، وکلا ، تاجر، صنعتکاروں سمیت مختلف شعبہ ہائے زندگی سے تعلق رکھنے والے افراد سے ملاقات کریں گے اور کراچی کا مقدمہ ان کے سامنے رکھیں گے۔
ایم کیو ایم رہنما کا مزید کہنا تھا کہ ایم کیو ایم کے بانی سے ایم کیو ایم کو الگ کیا تھا اور وہ اس فیصلے پر قائم ہیں، ڈاکٹر عمران فاروق کو لندن میں قتل کیا گیا اور یہ معاملہ 2 حکومت کے درمیان بھی آیا۔
