لاہور(رپورٹنگ آن لائن )فیڈرل بورڈ آف ریونیو نے ان لینڈ ریونیو ریوارڈ رولز 2021 میں ترمیمی مسودہ جاری کر دیا ہے جس کے تحت کسی بھی مالی سال میں کسی ملازم کو 24 بنیادی تنخواہوں سے زائد انعام نہیں دیا جا سکے گا۔
مجوزہ ترامیم انکم ٹیکس آرڈیننس 2001، سیلز ٹیکس ایکٹ 1990، فیڈرل ایکسائز ایکٹ 2005 اور آئی سی ٹی ٹیکس آن سروسز آرڈیننس کے تحت متعارف کرائی گئی ہیں۔ ترمیم کا اطلاق ان لینڈ ریونیو ریوارڈ رولز 2021 کے رول 6 پر ہوگا، جس میں رول 6 کی شق 2 کو تبدیل کرنے کی تجویز دی گئی ہے تاکہ ریوارڈ کی حد واضح طور پر مقرر کی جا سکے۔
ایف بی آر کے مطابق اس ترمیم کا مقصد انعامات کے نظام میں شفافیت، توازن اور یکساں اصولوں کے نفاذ کو یقینی بنانا اور غیر ضروری تفاوت کو ختم کرنا ہے۔
