لندن (رپورٹنگ آن لائن)ایشیز سیریز میں آسٹریلیا سے 4ـ1 سے شکست پر انگلینڈ کے سابق کپتان جیفری بائیکاٹ اپنی ٹیم پر پھٹ پڑے۔
میڈیا رپورٹ کے مطابق جیفری بائیکاٹ نے کہا کہ انگلینڈ ٹیم اس وقت تک تبدیل نہیں ہوگی جب تک مغرور رجیم ختم نہیں ہو گا، برینڈ میکلم، راب کی اور بین اسٹوکس نے تین برسوں میں جھوٹ بیچا ہے۔انہوں نے کہا کہ تینوں کی رجیم نے انگلینڈ کرکٹ لورز کو مایوس کیا ہے، برینڈن میکلم اور راب کی نے ہمیشہ یہی کہا کہ وہ ایشیز کی تیاری کر رہے ہیں۔
انہوںنے کہاکہ اس ایشیز سیریز میں غلطیوں پر غلطیاں کی گئیں، وہ 4ـ1 سے ہارنے کے حقدار تھے، برینڈ میکلم کی فلاسفی یہی ہے اپنے انداز میں چلو دنیا کی پرواہ کیے بغیر کھیلو۔انگلینڈ کے سابق کپتان نے کہا کہ کھلاڑیوں کو کہا جاتا ہے جاؤ اور خود کا اظہار کرو، آؤٹ ہو جاؤ نوپرابلم، ان سے کوئی جان نہیں چھڑاتا، کوئی کسی کو ڈراپ نہیں کرتا، کوئی احتساب نہیں ہوتا، اپنی مرضی کی چیزیں کرنے کیلئے فری لائسنس دیا گیا ہے۔
جیفری بائیکاٹ نے کہا کہ ہمارے پاس باصلاحیت کرکٹرز ہیں تاہم ان کی اسکلز کو نہیں نکھارا گیا، تین عقل مند افراد بتاتے رہے ہیں کہ وہ جانتے ہیں کہ آسٹریلیا میں ایشیز جیتنا کتنا اہم ہے۔انہوں نے کہا کہ آسٹریلیا میں جیتنے والے تمام سابق کرکٹرز بتاتے رہے ہیں کہ وہ غلط کر رہے ہیں،
یہ تین عقل مند افراد سمجھتے رہے ہیں کہ وہ بہتر جانتے ہیں، ان تینوں نے آسٹریلیا میں کبھی سیریز نہیں جیتی۔انہوںنے کہاکہ سابق کرکٹرز کو ماضی کا حصہ قرار دے کر ہمارے کپتان نے خود کو شرمندہ اور سابق کھلاڑیوں کو بے عزت کیا ہے، یہ کبھی اپنی نوکریاں کھونا نہیں چاہیں گے کیونکہ انہیں بہت معاوضہ ملتا ہے۔
