واشنگٹن (رپورٹنگ آن لائن)امریکی سینیٹر ٹیڈ کروز نے کہا ہے کہ ایرانی مظاہرین کو مسلح کرنے کی ضرورت ہے تاکہ وہ موجودہ قیادت پر قابو پاسکیں۔عرب میڈیا کے مطابق امریکی ریاست ٹیکساس سے تعلق رکھنے والے سینیٹر ٹیڈ کروز نے سوشل میڈیا پلیٹ فارم ایکس پر جاری ہونے والے بیان میں کہا ہے کہ ایرانی سپریم لیڈر سے جان چھڑانے بعد امریکا پہلے سے زیادہ محفوظ ہوجائے گا، کیوں کہ ایرانی سپریم لیڈر آیت اللہ خامنہ ای امریکا مردہ باد کا نعرہ لگاتے ہیں۔
سینیٹر ٹیڈ کی جانب سے یہ بیان تہران بیورو نامی ایکس اکانٹ پر جاری ہونے والے ایک بیان کے ردِعمل کے طور پر سامنے آیا ہے، جس میں ایران میں جاری مظاہروں کے دوران فسادات میں مارے جانے والے افراد کے حوالے سے عالمی امداد کی فراہمی کا ذکر کیا گیا تھا۔سینیٹر ٹیڈ کروز ایرانی قیادت کے حوالے سے سخت موقف رکھنے والے امریکی سیاست دانوں میں گنے جاتے ہیں، انہوں ایران اسرائیل جنگ کے دوران ایرانی حکومت پر امریکی صدر کے قتل کی مبینہ سازش کا بھی الزام عائد کیا تھا۔
