گلگت (رپورٹنگ آن لائن)وفاقی وزیر برائے منصوبہ بندی،ترقی اسد عمر نے کہا ہے کہ اپوزیشن نے بجٹ کو مسترد نہیں کیا ، عوام نے اپوزیشن کو مسترد کیا ہے،وزیراعظم پاکستان عمران خان کی ہدایات کی روشنی میں گلگت بلتستان کی ترقی کے لیے ترجیحاتی بنیادوں پر کام کر رہے ہیں، ترقیاتی پیکج کے تحت گیارہ منصوبوں کی منظوری سی ڈی ڈبلیو پی نے دیدی ہے ، سی پیک منصوبوں کے تحت گلگت چترال ایکسپریس وے پر 50 ارب خرچ ہونگے۔
وہ ہفتہ کو یہاں وزیر اعلی گلگت بلتستان خالد خورشید،وزیر خزانہ گلگت بلتستان جاوید منوا،وزیر اطلاعات فتح اللہ خان اور سینئر وزیر گلگت بلتستان عبید اللہ بیگ کے ہمراہ ایک پریس کانفرنس سے خطاب کررہے تھے ۔ اسد عمر نے کہا کہ گلگت بلتستان کی ترقی کے لئے جو پیکج تیار کیا گیاہے اس میں فیڈرل پی ایس ڈی پی کے 19 میگا منصوبے شامل کئے گئے ہیں جن میں 11 منصوبوں کی ایکنگ اور سی ڈی ڈبلیو پی نے منظوری دے دی ہے جن کے لیے رواں سال 56 ارب روپے مختص کئے گئے ہیں اور تکمیل تک 135 ارب روپے خرچ ہونگے۔ باقی منصوبوں کی بھی جلد منظوری مل جائے گی۔ انہوں نے کہاکہ سی پیک منصوبوں کے تحت گلگت چترال ایکسپریس وے پر 50 ارب خرچ ہونگے۔
انہوں نے کہا ہے کہ ان منصوبوں کی تکمیل سے گلگت بلتستان حقیقی معنوں میں ترقی کرے گا اور یہاں خوشحالی آئے گی۔انہوں نے کہا ہے کہ وفاقی پی ایس ڈی پی کے علاوہ بھی وفاقی حکومت گلگت بلتستان کو پسماندگی سے نکالنے کے لیے اقدامات کرے گی۔ وفاقی وزیر نے کہا ہے کہ گلگت بلتستان میں انٹرنیٹ کی بہتری کے لیے اگلے 2سے3 ماہ میں سپیکٹرمز کی نیلامی ہوگی۔
انہوں نے کہا ہے کہ گلگت بلتستان کے نوجوانوں میں کاروباری صلاحیتوں میں اضافے کے لیے 500 ملن کی لاگت سے انکوبیشن سینٹرز قائم کیے جا رہے۔ گلگت بلتستان کو عبوری آ ئینی صوبہ بنانے کے حوالے سے ایک سوال کے جواب میں وفاقی وزیر برائے منصوبہ بندی،ترقی نے کہا ہے کہ پوری قومی لیڈر شپ اس بات پر متفق ہے کہ گلگت بلتستان کو آ ئینی حقوق ملنے چاہئے،اس میں کوئی دو رائے نہیں۔
اس معاملے میں بھارت سے کوئی بیک ڈور ڈپلومیسی نہیں ہو رہی۔اس کے لیے ایک پروسیس ہے اس کے بعد گلگت بلتستان کو آ ئینی دھارے میں شامل کیا جائے گا۔ کورونا وائرس سے تحفظ کے لئے انہوں نے عوام سے اپیل کی ہے کہ وہ جلد ازجلد ویکسین کروائیں۔اس مقصد کے لیے گلگت بلتستان کے 6 مقامات پر ماس ویکسینیشن سینٹرز قائم کئے جا رہے ہیں۔وفاقی حکومت گلگت بلتستان کو 30 موبائل یونٹس دے رہی ہے جن کو دور دراز علاقوں میں ویکسین کے لیے استعمال کیا جائے گا۔
