لاہور (رپورٹنگ آن لائن) گورنرپنجاب چوہدری محمد سرور نے کہا ہے کہ اپوزیشن لانگ مارچ کرے یا شارٹ مارچ حکومت کوکوئی خطرہ نہیں ، یہ لوگ جلسے کر کر کے تھک جائے گی مگرحکومت قائم رہے گی،
تفصیلات کے مطابق ہفتہ کو گورنرپنجاب چوہدری محمد سرور سے صوبائی وزیر محمود الرشید کی ملاقات ہوئی ، ملاقات میں چوہدری محمد سرور نے کہا کہ 31جنوری بھی گزر جائے گی پی ڈی ایم کے استعفے نہیں آئیں گے ، یہ لوگ جلسے کر کر کے تھک جائیں گے، مگرحکومت قائم رہے گی،گورنرپنجاب کا کہنا تھا کہ لانگ مارچ کب اور کہاں ہونا ہے اپوزیشن میں اس پر واضح تقسیم ہے، اپوزیشن لانگ مارچ کرے یا شارٹ مارچ حکومت کو کوئی خطرہ نہیں ، جلسوں اوراحتجاج سے حکومت ختم ہونے والی نہیں،
انھوں نے کہا کہ احتساب کو بریک لگوانے کا اپوزیشن کا پلان ناکام ہوگا ، قانون کی حکمرانی اور احتساب سے پیچھے نہیں ہٹیں گے ، پی ڈی ایم جماعتوں کے انتشار کے ایجنڈے کو عوام نے مسترد کردیا ہے، وزیراعظم عمران خان کی قیادت پاکستان آگے بڑھتا رہے گا، اس موقع پر گفتگو کرتے ہوئے صوبائی وزیر محمود الرشید کا کہنا تھا کہ عمران خان اصولی سیاست سے ایک انچ بھی پیچھے نہیں ہٹیں گے، اگر مخالفین سمجھتے ہیں جلسوں سے حکومت دباﺅ میں آئیگی توایسا کبھی نہیں ہوگا۔
