لاہور (رپورٹنگ آن لائن)نگران وزیر اعلی پنجاب محسن نقوی نے ملتان کے نشتر ہسپتال ٹو، سرائے نشتر ہسپتال، کارڈیالوجی انسٹی ٹیوٹ و توسیعی ایمرجنسی بلاک اور کاٹن ریسرچ انسٹی ٹیوٹ کے دورے کئے ـ نگران وزیر اعلی محسن نقوی نے سرائے نشترہسپتال کا افتتاح کیا اور سرکٹ ہاؤس میں تاجروں اور وکلاء کے وفود سے ملاقات کیـ نشترہسپتال ٹو کے دورے کے بعد میڈیا سے گفتگو کرتے ہوئے نگران وزیراعلیٰ پنجاب محسن نقوی نے کہا کہ ہم اپنا کام خود کر رہے ہیں۔ ہمیں کوئی ہینڈل نہیں کر رہا۔
ڈویلپمنٹ کیلئے کچھ نہ کچھ ضرور کریں گے۔ نشتر ٹو ہسپتال ملتان اور گرد و نواح کے عوام کی اشد ضرورت ہے، اس ہسپتال کو ستمبر تک سو فیصد سٹاف کے ساتھ فنکشنل کر دیا جائے گا۔ نئے ہسپتال کو فعال کرنے کیلئے پرانے نشتر ہسپتال سے سٹاف نہیں لیا جائے گا۔ بھرتیوں پرپابندی ہے ، الیکشن کمیشن نے ڈاکٹروں کی بھرتی کی اجازت دی اورنشتر ٹو کے لئے ڈاکٹرز اور پیرامیڈیکل سٹاف کی بھرتیوں کا عمل شروع ہو چکا ہے۔محسن نقوی نے کہا کہ نشتر ٹو کا سنگ بنیاد وزیراعظم شہباز شریف نے رکھا تھا، افتتاح پر انہیں ساتھ لائیں گے۔ ملتان میں اگلے ماہ تک کارڈیالوجی انسٹی ٹیوٹ کا توسیعی منصوبہ بھی مکمل فنکشنل ہوگا۔چلڈرن ہسپتال کی نئی ایمرجنسی مخیر حضرات کے اشتراک سے جلد بنائی جائے گی۔
ملتان کے ڈسٹرکٹ ہیڈکوارٹر ہسپتال کی نئی عمارت بھی اگست کے آخر تک فعال ہو جائے گی۔ ملتان کے جاری ترقیاتی منصوبوں کو بجٹ دے کر مکمل کریں گے۔ محسن نقوی نے ملتان میں نشتر ہسپتال ٹو کے زیر تکمیل پراجیکٹ کا دورہ کیا اور ہسپتال کے زیر تکمیل مختلف شعبے دیکھے۔ انہوں نے آئوٹ ڈور، فارمیسی، لیبارٹری، الٹراسائونڈ اور دیگر ڈیپارٹمنٹ کا جائزہ لیا۔ نشتر ٹو کے پراجیکٹ ڈائریکٹر نے پراجیکٹ کے بارے میں مکمل بریفنگ دی۔ محسن نقوی نے تعمیراتی اور دیگر امور کو جلد مکمل کرنے کی ہدایت کی۔ قبل ازیں نگران وزیراعلیٰ محسن نقوی نے ملتان میں کاٹن ریسرچ انسٹی ٹیوٹ کا دورہ کیا اور مختلف شعبوں کا معائنہ کیا۔ محسن نقوی نے کاٹن ریسرچ انسٹی ٹیوٹ کی کارکردگی کا جائزہ لیا۔
نگران وزیراعلیٰ محسن نقوی کو کپاس کی مختلف ورائٹیز اور کاشت کے بارے میں بریفنگ دی گئی۔ وزیراعلیٰ محسن نقوی نے کپاس کو سنڈیوں کے حملے سے بچانے کیلئے پیشگی حفاظتی اقدامات کرنے کا حکم دیا اور کہا کہ ضروری مشینری کیلئے ایک ارب روپے کے اجراء کی منظوری دے دی ہے۔ رواں برس کپاس کے زیر کاشت رقبے میں اضافہ ہوا ہے اور اچھی پیداوار کی توقع ہے۔کاشتکاروں کیلئے یوریا کھاد اور زرعی آلات کا بروقت انتظام کیا جائے گا۔بعد ازاںنگران وزیراعلیٰ محسن نقوی نے ملتان میں انسٹی ٹیوٹ آف کارڈیالوجی اورنئے توسیعی پراجیکٹ کا دورہ کیااور ہسپتال کے مختلف شعبوں کا جائزہ لیا ـانہو ں نے ایمرجنسی بلاک کے زیر تکمیل منصوبے کا بھی جائزہ لیاـمحسن نقوی کو انسٹی ٹیوٹ آف کارڈیالوجی پراجیکٹ کے بارے میں تفصیلی بریفنگ دی گئیـ محسن نقوی نے ایمرجنسی بلاک کے منصوبے کو بر وقت مکمل اور فنکشنل کرنے کا حکم دیاـ
انہوںنے فارمیسی کا دورہ بھی کیا،نگران وزیراعلی محسن نقوی نے مریضوں سے بھی گفتگو کیـتیمارداروں کے لئے انتظارگاہ میں سہولتوں کا جائزہ لیا، محسن نقوی نے ویٹنگ ایریامیں سہولتیں بہتر بنانے کی ہدایت کیـنگران وزیر اعلی محسن نقوی نے مریضوں اور تیمارداروں کے لئے واٹر کولر کے پانی کوبھی چیک کیاـمریضوں اور تیمارداروں سے دستیاب سہولتوں کے بارے میں دریافت کیاـنگران وزیر اعلی نے ہسپتال میں سہولتوں کا معیار مزید بہتر بنانے کا حکم دیاـمحسن نقوی نے مریض کی اپیل پر حکام کو مسئلے کے فوری حل کی ہدایت کیـنگران وزیر اعلی محسن نقو ی نے اس موقع پر ہدایت کی کہ ایمرجنسی بلاک کی تکمیل میں شفافیت ، معیار اور رفتار کو ضرورمد نظررکھا جائے ـ
نگران وزیر اعلی محسن نقوی نے سرائے نشتر ہسپتال کا باقاعدہ آغازکیا ا ور سرائے نشتر ہسپتال میں دستیاب سہولتوں کا جائزہ لیا،محسن نقوی نے ائرکنڈیشنرزلگانے کی ہدایت کی اورسرائے نشتر ہسپتال میں قیام کا دورانیہ 24 گھنٹے کرنے کا حکم دے دیاـ نگران وزیر اعلی نے بہاولپوراورراولپنڈی میں بھی مسافرو ں کے لئے سرائے کی جلد تکمیل کی ہدایت کیـ بریفنگ میں بتایا گیا کہ سرائے نشتر ہسپتال کی 3 منزلہ عمارت9 کروڑ77 لاکھ روپے کی لاگت سے مکمل کی گئی ـ10 ہالز میں 60مرداور 32 خواتین کے قیام کی گنجائش ہے جبکہ ناشتہ اور رات کا کھانا مہیا کیا جائے گاـ
سرائے نشتر ہسپتال میں مرد و خواتین کیلئے الگ ڈائننگ روم، کچن، رہائشی ہالز، 20 واش رومز تعمیر کئے گئے ہیںـنگران وزیر اعلی محسن نقوی سے سرکٹ ہاؤس ملتان میں تاجروں اور وکلاء کے وفودنے ملاقاتیں کیںـ ملتان کی تاجر برادری نے نگران وزیر اعلی محسن نقوی کو سفارشات اور تجاویز پیش کیں ـنگران وزیر اعلی محسن نقوی نے کہا کہ مارکیٹوں کی بندش کے بارے میں تاجر برادری سے مشاورت کی جائے گیـ تاجر معاشرے کا اہم حصہ ہیں ، مسائل حل کئے بغیر ترقی ممکن نہیں ـ معاشی اہداف حاصل کرنے کے لئے تاجروں کے جائز مسائل حل کریں گے ـ ملتان میں انڈسٹریل اسٹیٹ کی توسیع کے مطالبے پر غور کیا جائے گاـ
نگران وزیر اعلی محسن نقوی نے ملتان ائرپورٹ کے نزدیک کولڈ سٹوریج کے قیام کی تجویز کا جائزہ لینے کی ہدایت کیـنگران وزیر اعلی محسن نقوی سے ملتان ، وہاڑی اور لودھراں کی ڈسٹرکٹ بار ایسوسی ایشنز کے عہدیداروں نے بھی ملاقات کی ـنگران وزیر اعلی محسن نقوی نے ملتان ڈسٹرکٹ بار ایسوسی ایشن کے لئے ایک کروڑ روپے ،وہاڑی اور لودھراں ڈسٹرکٹ بار ایسوسی ایشنز کے لئے 50،50 لاکھ روپے کی گرانٹ کے چیک دیئےـڈسٹرکٹ بار ملتان کے صدر وحید بخاری ، جنرل سیکرٹری الطاف گیلانی ، وہاڑی کے صدر لیاقت سنپال ، جنرل سیکرٹری نثار احمد ، لودھراں کے صدر کامران خان ، جنرل سیکرٹری اعجاز سہو بھی اس موقع پر موجود تھےـصوبائی وزراء عامر میر ، اظفر علی ناصر ، ایڈیشنل چیف سیکرٹری ساؤتھ پنجاب ، کمشنر ، ڈپٹی کمشنر،آرپی اواور متعلقہ حکام بھی اس موقع پر موجود تھے۔
