لاہور(رپورٹنگ آن لائن) پاکستان تحریک انصا ف کے سینئر مرکزی رہنما و سابق وفاقی وزیر ہمایوں اخترخان نے کہا ہے کہ اپوزیشن بتائے پاکستان کس کے دورمیں فیٹف کی گرے لسٹ میں گیا،ہم نے بطور ریاست اسے وائٹ لسٹ میں لاناہے، ان ہاﺅس تبدیلی کا صفر فیصد بھی کوئی امکان موجود نہیں ،پیپلز پارٹی اور مسلم لیگ (ن) میثاق جمہوریت کوصرف اپنے مفادات تک محدود نہ رکھیںبلکہ اس میثاق کو مکمل جمہوریت تک توسیع دیں اور پانچ سال صبر کریں۔
گزشتہ روز اپنی رہائشگاہ پر ملاقات کےلئے آنے والے وسطی پنجاب کے پارٹی رہنماﺅں کے وفد سے گفتگو کرتے ہوئے ہمایوں اخترخان نے کہا کہ اپوزیشن والے کہتے ہیں مجوزہ اے پی سی میں شامل ہونے والی جماعتوںکے نظریات مختلف ہیں لیکن قوم جانتی ہے کہ ان کا کرپشن اورلوٹ مار کرنے کاہدف ایک ہی ہے اور حالیہ سر گرمیاں بھی اسی کی کڑی ہیں ۔
پیپلز پارٹی اور مسلم لیگ (ن) نے ملک و قوم کی بھلائی کےلئے اپوزیشن کا کردار ادا نہیں کیا بلکہ صرف این آراو کے حصول کےلئے ہر طرح سے مزاحمت کی گئی ،انہیں آج ریلیف مل جائے تویہ فیٹف کی قانون سازی تو کیا ہر معاملے میںحکومت سے تعاون کرنے اور حکومت کو کامیابی کے سرٹیفکیٹس جاری کرنے پر آمادہ ہو جائیں گے لیکن وزیر اعظم عمران خان اپنے مفادات کےلئے ملک کے مفادات کو داﺅ پر نہیں لگائیں گے۔
ہمایوں اخترخان نے کہا کہ پیپلز پارٹی کسی نہ کسی طرح چھ دہائیوں سے اقتدارمیں ہے جبکہ مسلم لیگ (ن) بھی چار دہائیوں سے حکومتوںمیں ہے ،دونوں بتائیں انہوں نے ملک کےلئے کیا ہے اورپہلی بارحکومت میں آ کر دو سال کا عرصہ گزارنے والی حکومت سے جواب طلبی اور اسے ناکام قرار دیا جارہا ہے ۔
انہوں نے کہا کہ اب قوم نے بھی فیصلہ کرلیا ہے کہ اب کرپشن اور پاکستان ساتھ نہیں چل سکتے اس لئے وہ وزیر اعظم عمران خان کا بھرپور ساتھ دے رہے ہیںجوکرپشن سے پاک اور خوشحال پاکستان کی نوید ہے ۔
