دبئی(رپورٹنگ آن لائن)انڈر 19ایشیا کپ کرکٹ ٹورنامنٹ میں دو میچ آفیشلز کے کووڈ ٹیسٹ مثبت آنے کے بعد بنگلا دیش اورسری لنکا کا میچ ختم کردیا گیا جس کے بعد ایونٹ کی سیمی فائنل لائن اپ مکمل ہوگئی۔سیمی فائنل میں پاکستان کا مقابلہ سری لنکا سے ہوگا جبکہ بنگلا دیش اور بھارت کی ٹیمیں مد مقابل ہوں گی۔
دونوں سیمی فائنلز جمعرات کو کھیلے جائیں گے۔انڈر 19ایشیا کپ میں گروپ بی کے آخری میچ میں سری لنکا کے خلاف بنگلا دیش کی اننگز کے 32 اوورز ہوئے تھے کہ کھیل روک دیا گیا اور چند منٹ بعد میچ ختم کرکے دونوں ٹیموں کو ایک ایک پوائنٹ دے دیا گیا۔
ایشین کرکٹ کونسل نے تصدیق کی کہ دو میچ آفیشلز کے کووڈ ٹیسٹ مثبت آنے کی وجہ سے میچ میں شریک تمام افراد کے دوبارہ پی ایس آر ٹیسٹ ہوں گے۔گروپ بی میں بنگلادیش پہلی اور سری لنکا دوسری پوزیشن پر رہا۔ سیمی فائنل میں پاکستان کا مقابلہ سری لنکا سے جب کہ بھارت کا مقابلہ بنگلہ دیش سے ہوگا۔ ایونٹ کے دونوں سیمی فائنل 30 دسمبر کو ہوں گے۔
