سوات(رپورٹنگ آن لائن) اسپیکر قومی اسمبلی اسد قیصر نے کہا ہے کہ خطے میں امن کے قیام سے خوشحالی آئے گی ،امن کے لیے قوم نے بھاری قیمت ادا کی ہے جسے تاریخ میں ہمیشہ یاد رکھا جائے گا، کسی کی جنگ میں 70ہزار جانوں کی قربانیاں دیں، ہم اس خطے میں امن چاہتے ہیں اور امن کا قیام خطے کی ترقی اور خوشحالی کے لیے ناگزیر ہے،
انہوں نے ان خیالات کا اظہار ہفتہ کو مالم جبہ سوات میں ینگ پارلیمنٹرین کی تقریب سے خطاب کرتے ہوئے کیا ، اسد قیصر نے کہا کہ افغانستان میں امن آنے سے خطے میں خوشحالی آئے گی، پاکستان ایک پر امن اور مستحکم افغانستان کا خواہاں ہے، افغانستان میں قیام امن سے خطے میں روابط کو فروغ ملے گا جس سے معاشی سرگرمیوں میں اضافہ ہو گا، خطے میں امن کے قیام سے تعمیر و ترقی کا حصول ممکن ہو سکے گا، انہوں نے کہا کہ خطے میں قیام امن کیلئے اپنی مصالحانہ کاوشیں جاری رکھیں گے،
اسد قیصر نے کہا کہ سابق فاٹا کے اضلاع کے لیے پارلیمنٹ اپنا کردار ادا کر رہی ہے اور بہت جلد فاٹا میں ترقی اور خوشحالی کے نئے دور کا آغاز ہو گا، اسپیکر قومی اسمبلی نے کہا کہ نوجوان پارلیمنٹرین کا کردار قابل ستائش ہے نوجوانوں کو ہر شعبے میں آگے بڑھنے کے لیے حوصلہ افزائی کی ضرورت ہے، پاکستان کو چیلنجر درپیش ہیں جن کے تدارک کے لیے مشترکہ کوششوں کی ضرورت، ان چیلنجز کو دیکھتے ہوئے ہمیں اپنی پارٹی کے اندر جدوجہد کرنی ہے،
انہوں نے کہا کہ بین الاقوامی حالات بدل رہے ہیں جس کے پاکستان پر اثرات مرتب ہو سکتے ہیں ہمیں دنیا کے ساتھ مل کر چلنا ہوگا، گلوبل سیاست پر سمینار منعقد ہونے چاہیں تا کے سیاستدانوں سمیت عوام کو آگاہی حاصل ہو سکے، اسد قیصر نے کہا کہ سوات کا علاقہ بہت زیادہ جنگ زدہ علاقہ رہا اس علاقے میں امن کے قیام کے لیے عوام نے قربانی د ی ، ہماری قوم جنگ سے گزری ہے جس کی وجہ سے ملک کو معاشی مسائل کا سامنا ہے، ہمیں بحیثیت پارلیمنٹرین رولز اور آئین کا پتا ہونا چاہیے،
جب انسان پختہ ارادہ کرتا ہے تو اللہ پاک کی مدد شامل حال ہو جاتی ہے،اچھی امید رکھنی چاہیے مثبت سوچ سے ہی انسان دنیا کا کامیاب انسان کہلاتا ہے، انہوں نے کہا کہ محنت اور لگن سے کام کریں کامیابی آپ کے قدم چومے گی اور معاشرہ بھی آپ کی قدر کرے گا،اسد قیصر کا کہنا تھا کہ میں اپنی جماعت کا نو سال صوبائی صدر رہا ہوں، وزیراعظم عمران خان نے مجھے صدر مملکت بننے کا کہا تھا،معاشرے میں بسنے والا ہر انسان بہت اہم ہے اور وہ بہت کچھ کر سکتے ہے، عوام کے فلاح و بہبود کے لیے کام کرنے میں انسان کی سوچ اور نیت بنیادی اہمیت اہمیت کی حامل ہے،
انسان جتنی بڑی سوچ کے ساتھ آگے بڑھتا ہے اللہ تعالی اس انسان سے اتنا ہی بڑا کام لیتا ہے،بہت سارے وزرائے اعظم آئے اور چلے گئے تاریخ ان کو یاد رکھتی ہے جو انسانیت کی فلاح و بہبود کے لیے کام کرتا ہے، اسپیکر قومی اسمبلی کا کہنا تھا کہ ہم نے اپنے سامنے ایک مشن اور مقصد رکھنا ہے، اپنی منزل تک پہنچنے کے لیے مزید جدوجہد کرنی ہے۔
