واشنگٹن (رپورٹنگ آن لائن)توقع ہے کہ مشرق وسطی کے لیے امریکی صدر کے خصوصی ایلچی اسٹیفن وٹکوف استنبول میں غزہ کی پٹی میں حماس تنظیم کے قائد خلیل الحیہ سے بات چیت کریں گے تاہم اسرائیلی اخبارکے مطابق واشنگٹن نے وٹکوف اور الحیہ کے درمیان ملاقات منسوخ کرنے کا فیصلہ کیا ہے۔
وِٹکوف استنبول میں حماس تنظیم کے ایک وفد سے بھی ملاقات کر سکتے ہیں، جس میں تنظیم کے دیگر اعلی سطحی نمائندے شامل ہوں گے۔ ایجنسی نے مزید کہا کہ امریکی صدر کے خصوصی ایلچی اور حماس تنظیم کے قائد کے درمیان یہ بات چیت اس بات کا اشارہ دیتی ہے کہ ٹرمپ انتظامیہ حماس تنظیم کے ساتھ براہِ راست رابطے کا چینل برقرار رکھنے کی خواہش رکھتی ہے۔
ایجنسی کے مطابق یہ ملاقات امریکی صدر ڈونلڈ ٹرمپ کی جانب سے غزہ کی پٹی کے حوالے سے جاری کردہ منصوبے کے بعد وِٹکوف اور الحیہ کے درمیان دوسری ملاقات ہو گی۔دونوں کی پہلی ملاقات رواں سال اکتوبر میں مصر کے دارالحکومت میں ہوئی تھی، جب غزہ کی پٹی میں جنگ بندی سے متعلق معاہدوں تک پہنچنے سے قبل مذاکرات جاری تھے، جن میں امریکی صدر کے داماد جیرڈ کشنر نے بھی حصہ لیا۔
