اسلام آباد(رپورٹنگ آن لائن) وزیرِ دفاع خواجہ آصف نے کہا ہے کہ امریکا کی وینزویلا میں کارروائی نے پنڈورا بکس کھول دیا ہے، کل پیوٹن بھی یوکرین کے صدر کو اس طرح اغوا کرکے ماسکو لے جا سکتے ہیں۔ ایک انٹرویو میں انہوں نے کہا کہ وینزویلا سے متعلق پاکستان نے اقوام متحدہ میں ایک واضح اور جرات مندانہ موقف اختیار کیا ہے، اگرچہ اس پر صدر ڈونلڈ ٹرمپ کی ناراضی کا خدشہ بھی ہو سکتا ہے، تاہم اصولی موقف سے پیچھے نہیں ہٹنا چاہیے۔وزیرِ دفاع کا کہنا تھا کہ اگر وینزویلا میں کسی کارروائی کو درست قرار دیا جائے تو پھر روس کی یوکرین میں کارروائی کو غلط کہنا بھی مشکل ہو جائے گا، اس طرح کے دوہرے معیارات عالمی نظام کو شدید نقصان پہنچا رہے ہیں۔
وزیرِ دفاع نے سوال اٹھایا کہ اگر آج وینزویلا کی کارروائی کو جائز سمجھا جائے تو کل روسی صدر پیوٹن بھی یوکرین کے صدر کو اغوا کر کے ماسکو لے جا سکتے ہیں، جس سے عالمی قانون کی حیثیت مزید کمزور ہو جائے گی۔انھوں نے کہا کہ لیبیا، شام اور دیگر ممالک میں بھی اسی طرز کی کارروائیاں ہو چکی ہیں، اور ان اقدامات نے ورلڈ آرڈر کو شدید دھچکا پہنچایا ہے۔وفاقی وزیر کا کہنا تھا کہ امریکا کی جانب سے وینزویلا میں کارروائی نے ایک پنڈورا بکس کھول دیا ہے، جس کے اثرات پوری دنیا پر مرتب ہوں گے۔
انہوں نے خبردار کیا کہ اگر امریکا نے ایران میں کسی قسم کی کارروائی کی تو یہ پاکستان سمیت پورے خطے کے لیے ایک بڑا چیلنج بن سکتا ہے۔ان کا مزید کہنا تھا کہ 2012 سے یہ کہا جا رہا ہے کہ ایران ایٹم بم بنا رہا ہے، مگر اس کے باوجود کوئی حتمی ثبوت سامنے نہیں آ سکا۔فلسطین کے حوالے سے بات کرتے ہوئے وزیرِ دفاع نے کہا کہ فلسطینیوں کے ساتھ جو کچھ ہوا ہے، اس کی مثال تاریخ میں نہیں ملتی۔انہوں نے اسرائیلی وزیراعظم نیتن یاہو کو انسانیت کا بدترین مجرم قرار دیتے ہوئے کہا کہ وہ اس وقت دنیا کا سب سے مطلوب شخص ہے۔خواجہ آصف کا کہنا تھا کہ اگر امریکا واقعی انسانیت کا دوست ہے تو اسے نیتن یاہو کو گرفتار کر کے عدالت میں پیش کرنا چاہیے، یورپ نے ماضی میں بڑے لیڈر پیدا کیے، مگر اس وقت یورپی قیادت کی خاموشی افسوسناک ہے۔
