واشنگٹن(رپورٹنگ آن لائن)امریکی ادارے فوڈ اینڈ ڈرگ ایڈمنسٹریشن (ایف ڈی اے)نے کورونا ویکسین کے دوسرے بوسٹر شاٹ کی منظوری دے دی ہے۔میڈیارپورٹس کے مطابق ایف ڈی اے کی جانب سے جاری ایک بیان میں کہا گیا کہ فائزر اور موڈرنا ویکسین کی چوتھی اور تیسری ڈوز کے چارماہ بعد بوسٹر شاٹ لگایا جاسکے گا، کورونا ویکسین کا دوسرا بوسٹر شاٹ 50 سال سے زائد عمر کے افراد کو لگایا جاسکے گا۔امریکی ادارے کا کہنا تھا کہ کمزور قوت مدافعت والے 12سال سے زائد عمر کے بچوں کو فائزر کا دوسرا بوسٹر شاٹ دیا جاسکے گا، جبکہ کمزور قوت مدافعت والے 18سال سے زائد عمر کے افراد کو موڈرنا کا دوسرا بوسٹر ڈوز لگایا جائے گا۔
وائٹ ہاوس کی کمیونیکیشن ڈائریکٹر کیٹ بیڈنگ فیلڈ نے پریس بریفنگ میں کہا کہ کورونا بوسٹر ڈوز کی دوسری خوراک کی منظوری اچھا فیصلہ ہے، دوسرے بوسٹر شاٹ کا مقصد شدید بیماری اور اسپتال میں داخل ہونے کے خلاف مزید تحفظ دینا ہے۔کیٹ بیڈنگ فیلڈ کا کہنا تھا کہ امریکی صدر جو بائیڈن معالج کے مشورے کے بعد دوسرا بوسٹر شاٹ لگوانے کا فیصلہ کریں گے۔
