اسلام آ باد (رپورٹنگ آن لائن) اسلام آباد ہائی کورٹ نے معطل ایڈیشنل سیشن جج جہانگیر اعوان اور ایم پی اے خاتون کے شوہر کے درمیان جھگڑا کیس میں شریک ملزم بلال عباسی کی 50 ہزار روپے کے مچلکوں کے عوض ضمانت منظور کرلی۔ چیف جسٹس اطہرمن اللہ نے ملزم بلال عباسی کی درخواست ضمانت کی سماعت کی۔
دوران سماعت چیف جسٹس ہائی کورٹ نے ریمارکس دیے کہ پولیس یونیفارم کی بڑی عزت ہے اس کو پامال نہ کریں۔ سرکاری وکیل نے کہاکہ مرکزی ملزم کو گرفتار کرلیا گیا ہے جسے ماتحت عدالت نے جوڈیشل ریمانڈ پر جیل بھیج دیا ہے۔ چیف جسٹس ہائی کورٹ نے پولیس حکام سے کہا کہ ریڈزون میں یہ واقعہ ہوا لیکن اصل ملزم کو آپ نے تھانے سے ہی چھوڑ دیا تھا۔ ایس ایچ او نے بتایا کہ ملزم بلال عباسی بھی جھگڑے کے دوران جج کو مارنے والے افراد میں شامل تھا۔
عدالت نے کہا کہ بار بار یہ کورٹ کہہ رہی ہے کہ اس شہر میں قانون کی حکمرانی نہیں ہے، جو طاقتور ملزم تھا اس کو پولیس نے تھانے سے ہی چھوڑ دیا تھا، عدالت نے بلال عباسی کی ضمانت منظور کرلی۔ ادھر اسی کیس میں پولیس نے مرکزی ملزم ایم پی اے عابدہ راجہ کے شوہر چوہدری خرم کو گرفتار کرکے مقامی عدالت میں پیش کیا جہاں عدالت نے ملزم چوہدری خرم کو جوڈیشل ریمانڈ پر جیل بھجوا دیا۔ ملزم کی گرفتاری اور عدالت پیشی کو انتہائی خفیہ رکھا گیا۔
