اسلام آباد (رپورٹنگ آن لائن ) اسلام آباد میں نیا بلدیاتی نظام ہائیکورٹ میں چیلنج کر دیا گیا‘ اسلام آباد ہائیکورٹ نے صدر پاکستان ، سیکرٹری داخلہ اور سیکرٹری قانون کو نوٹسز جاری کرتے ہوئے 11 جنوری کو جواب طلب کر لیا ۔
تفصیلات کے مطابق بدھ کو اسلام آباد کے بلدیاتی نمائندوں نے عدالت میں نئے لوکل گورنمنٹ آرڈیننس کو چیلنج کیا ہے۔ جسٹس محسن اختر کیانی اسلام آباد ہائیکورٹ نے کیس کی سماعت کرتے ہوئے صدر پاکستان ‘ سیکرٹری داخلہ، سیکریٹری قانون اور اٹارنی جنرل کو نوٹس جاری کرکے 11 جنوری کو طلب کرلیا۔
درخواست گزارسردارمہتاب یہ موقف اختیار کیا کہ مئیرکا براہ راست انتخاب، ڈپٹی مئیرز کا عہدہ ختم کرنا خلاف قانون ہے۔درخواست گزار قاضی عادل ایڈووکیٹ نے اپنی درخواست میں یہ موقف اختیارکیا گیا کہ لوکل گورنمنٹ چلانے کے لیے غیرمنتخب افراد کی کونسل بھی خلاف قانون ہے۔
درخواست گزار کا موقف ہے کہ لوکل گورنمنٹ 2015ئ کے قانون کی موجودگی میں آرڈیننس کے ذریعے نیا نظام آئین سے متصادم ہے۔ اسلام آباد ہائی کورٹ نے 11 جنوری تک سیکرٹری داخلہ، سیکرٹری قانون سے جواب طلب کرلیا۔
