اوکاڑہ
( شیر محمد)ٹریفک قوانین پر عملدرآمد کے بعد ہیلمٹ کی اوور چارجنگ کی شکایات پر فوری ایکشن لیتے ہوئے اسسٹنٹ کمشنر چوہدری رب نواز نے مختلف دکانوں کی چیکنگ کی اور زائد قیمت پر فراہم کیے جانے والے ہیلمٹ اپنی تحویل میں لے لیے اور دکانداروں کو وارننگ بھی دی گئی، انہوں نے ضبط شدہ ہیلمٹس شہریوں میں سرکاری طور پر مقرر کردہ مارکیٹ ریٹس پر تقسیم کر دیے تاکہ عوام کو ریلیف فراہم کیا جا سکے اور ذخیرہ اندوزی و منافع خوری کا خاتمہ ممکن بنایا جا سکے،
اس موقع پر اسسٹنٹ کمشنر چوہدری رب نواز نے کہا کہ حکومت شہریوں کو ریلیف فراہم کرنے کے لیے ہر ممکن اقدام کر رہی ہے اور کسی کو بھی عوامی ضرورت کی اشیاء پر ناجائز منافع خوری کی اجازت نہیں دی جائے گی، انہوں نے واضح کیا کہ آئندہ بھی قیمتوں پر سخت مانیٹرنگ جاری رکھی جائے گی اور خلاف ورزی کرنے والوں کے خلاف بلاامتیاز کارروائی ہوگی، شہریوں نے ضلعی انتظامیہ کے اس اقدام کو سراہتے ہوئے کہا کہ مقررہ نرخوں پر ہیلمٹس کی فراہمی ایک قابلِ تحسین قدم ہے جو ٹریفک قوانین پر عملدرآمد اور عوامی تحفظ کو فروغ دے گا۔
