اسلام آباد (رپورٹنگ آن لائن) پاکستان مسلم لیگ (ن)کے مرکزی رہنما احسن اقبال نے کہاہے کہ آٹا اور چینی سکینڈل میں 4 سو ارب روپے کی کرپشن سامنے آ چکی کوئی نہیں بولتا،نیب نے جس طرح عمران نیازی کی فرمائش پر کیس بنائے وہ مذاق بن گیا ہے،
ادارے عمران خان کے ماتحت ہیں مجھ پر کرپشن ثابت کر کے دکھاؤ،میری وزارت سے 32 سو روپے ترقیاتی کاموں کیلئے جاری ہوئے ،32 روپے رشوت میں ثابت کر دو میں مجرم ہونگا،عمران خان اور وزیر ہوا بازی کے بیان کی وجہ سے ایک سو ارب روپے سے زیادہ نقصان ہو گیا ،پوری ایوی ایشن انڈسٹری بیٹھ گئی خکوئی نوٹس نہیں لیتا،جب سیکیورٹی ایجنسیوں کو سیاست دانوں کے پیچھے لگا دیا جائے گا تو دہشتگردوں کو کھلی چھوٹ ملے گی۔
میڈیا سے گفتگو کرتے ہوئے احسن اقبال نے کہاکہ نارووال سپورٹس سٹی ٹرائل کے سلسلے میں پھر پیش ہوا ہوں،یہ وہ انتقامی کارروائیاں ہیں جن کی وجہ 2018 تک کے ترقیاتی کام ہیں،جس شخص نے اس ترقی میں حصہ ڈالا انکو آج جیلوں میں ڈالا جا رہا ہے،جنہوں نے اس ترقی کو نیست و نابود کیا وہ آج گلشرے اڑاتے پھر رہے ہیں،دنیا میں پاکستان کی جگ ہنسائی ہو رہی ہے۔ انہوںنے کہاکہ نیب نے جس طرح عمران نیازی کی فرمائش پر کیس بنائے وہ مذاق بن گیا ہے،عمران خان صاحب ادارے آپ کے ماتحت ہیں مجھ پر کرپشن ثابت کر کے دکھاؤ۔ انہوںنے کہاکہ میری وزارت سے 32 سو روپے ترقیاتی کاموں کیلئے جاری ہوئے 32 روپے رشوت میں ثابت کر دو میں مجرم ہونگا۔
انہوںنے کہاکہ یہ پراجیکٹ تمام متعلقہ فورمز سے منظور ہوا،حکومت کا اصل ایجنڈا کوئی اور ہے وہ کرتار پور بنانے والوں کو فریم کرنا چاہتی ہے ،کرتار پور کی تعمیر میں 17 ارب روپے لگے اور اسکا پی سی ون بھی منظور نہیں ہوا کوئی منظوری بھی نہیں ہوئی تھی،جس منصوبے کی کوئی منظوری نہیں ہوئی وہ حلال ہے جس کی منظوری ہوئی وہ حرام ہے۔
انہوںنے کہاکہ آٹا اور چینی سکینڈل میں 4 سو ارب روپے کی کرپشن سامنے آ چکی ہے کوئی نہیں بولتا،عمران خان اور وزیر ہوا بازی کے بیان کی وجہ سے ایک سو ارب روپے سے زیادہ نقصان ہو گیا ،پوری ایوی ایشن انڈسٹری بیٹھ گئی خکوئی نوٹس نہیں لیتا۔
انہوںنے کہاکہ چار ایجنسیوں کو ملا کر پنجاب میں کمیٹی بنائی گئی ہے ،جو ن لیگ کے عہدیداروں کے خلاف جھوٹے مقدمات بنا رہے ہیں،اگر یہ سلسلہ بند نہ ہوا تو ہمیں وہ نام لینے پڑینگے جو یہ سب کر رہے ہیں،سیکیورٹی اداروں سے کہتا ہوں کہ حکومت کا آلہ کار نہ بنیں حکومت آپکو اپنی بقا کیلئے استعمال کر رہی ہے۔
انہوںنے کہاکہ سیکیورٹی ادارے دہشتگردی کے خلاف اپنی کارروائیاں جاری رکھیں،انٹیلی جنس بیورو کو سیاسی انتقامی کارروائیوں میں جھونک دیا گیا ہے،جب سیکیورٹی ایجنسیوں کو سیاست دانوں کے پیچھے لگا دیا جائے گا تو دہشتگردوں کو کھلی چھوٹ ملے گی۔ انہوںنے کہاکہ ماضی میں حکومت چھینک مارتی تھی تو ادارے کہتے تھے کہ فلو ہو گیا ہے،آج حکومت کینسر زدہ ہے اور ادارے کہہ رہے ہیں کہ معمولی بخار ہے۔ انہوںنے کہاکہ پی ڈی ایم اس حکومت کو گھر بھیجے گی۔
