اسلام آباد( رپورٹنگ آن لائن)صدر مملکت آصف علی زرداری نے چینی سال نو موسم بہار کے تہوار کی آمد کے موقع پر عوامی جمہوریہ چین کے صدر شی جن پنگ کو دلی مبارکباد پیش کی ہے۔
بدھ کو ایوان صدر کے پریس ونگ سے جاری بیان کے مطابق صدر مملکت نے اپنے خط میں پاکستان اور چین کے مابین آہنی دوستی مضبوط بنانے کے عزم کا اعادہ کرتے ہوئے کہاکہ دوطرفہ تعاون مضبوط بنانے اور دوستی کے بندھن کو آگے بڑھانے کیلئے بیجنگ میں چینی صدر سے تبادلہ خیال کا منتظر ہوں۔ انہوں نے کہا کہ پاکستان ون چائناپالیسی پر مضبوطی سے کاربند رہے گا جو ہماری خارجہ پالیسی کا بنیادی ستون ہے۔
صدر مملکت نے کہا کہ دونوں ممالک کے درمیان سدابہار تزویراتی تعاون کی شراکت داری ہے، دونوں ممالک کی قیادت کی پے در پے نسلوں کی انتھک کوششوں نے بین الریاستی تعلقات کے اس منفرد اور مثالی بندھن کو پروان چڑھایا اور مضبوط کیا ہے۔ صدر مملکت نے خط میں پاک چین تعلقات اور پاک چین اقتصادی راہداری کو آگے بڑھانے میں چینی صدر کی بصیرت انگیز قیادت کا شکریہ ادا کیا۔
صدر مملکت نے پاک چین تعلقات کو آگے بڑھانے میں صدر شی جن پنگ کی غیر متزلزل حمایت بالخصوص چین پاکستان اقتصادی راہداری کو آگے بڑھانے میں ان کی بصیرت انگیز قیادت کیلئے ان کا تہہ دل سے شکریہ ادا کیا۔ انہوں نے کہا کہ چین نے 2024میں مختلف شعبوں میں غیر معمولی ترقی کی ہے۔ صدر آصف علی زرداری نے خط میں پاکستان اور چین کے درمیان پائیدار اور مسلسل بڑھتی ہوئی دوستی کو سراہا ۔ صدر مملکت نے صدر شی جن پنگ کی صحت، چینی عوام کی مسلسل ترقی اور خوشحالی کے لئے بھی نیک خواہشات کا اظہار کیا.
