لاہور(رپورٹنگ آن لائن) نائب امیر جماعت اسلامی پاکستان وسابق پارلیمانی لیڈر لیاقت بلوچ نے کہا ہے کہ آزاد کشمیر انتخابات کو پاکستان حکومت اور پاکستان کی مین سٹریم جماعتوں نے بے وقار،گدلا اور متنازع بنا دیا ہے، جماعت اسلامی کے لئے عبدالرشید ترابی کا فیصلہ بڑا دھچکا بنا ہے، گلگت بلتستان انتخابات اور اب آزاد کشمیر میں انتخابات سے یہ امر عیاں ہو گیا کہ سیاسی جمہوری قوتیں ریاستی اداروں کی طرح شفاف غیرجانبدارانہ مہذب اور بااعتماد انتخابات کے لئے کوئی وژن اور ارادہ نہیں رکھتیں۔
لاہور میں مقیم کشمیریوں کے وفد سے گفتگو کرتے ہوئے انہوںنے کہاکہ ملک بھر میں ملک ،جمہوریت ، شفاف انتخابات اور باوقار پارلیمانی نظام کی تمنا اور خواب رکھنے والی قوتیں جماعت اسلامی کا ساتھ دیں۔ انتخابات اصلاحات کی قومی جدوجہد کا حصہ بنیں ورگرنہ جمہوریت اور انتخابات بے معنی ہو جائیں گے اور ملک انارکی کی طر ف دھکیل دیا جائے گا۔پاکستان دشمن قوتیں یہی چاہتی ہیں اور بے فکرے سیاسی انتخابی جفادری اپنی د نیا میں مست ہیں۔
انہوںنے کہا کہ بجلی کا بدترین بحران حکومت کی نااہلی ، ناکامی ہے۔بجلی ، گیس اور پٹرولیم مصنوعات کا بحران اور ہوشربا قیمتیں یومیہ اجرت پر کام کرنے والے طبقہ اور سفید پوش طبقہ کے لئے موت کا پروانہ اور خوشیاں چھیننے کا باعث بن گئی ہیں۔ سودخور،قرضوں اور کرپشن میں لتھڑی حکومت اقتصادی بحران ختم نہیں کر سکتی۔حکومت اپنی ناکامیوں کو چھپانے کے لئے سیاسی محاذ پرسوچے سمجھے منصوبہ کے ساتھ فساد پھیلارہی ہے تا کہ عوام میں زہریلی پولورائیزیشن قائم رہے اور عوام اوروٹرز اپنے اپنے دھڑوں کے ساتھ جذباتی اور بے اصولی کی بنیادوں پر وابستہ رہیں۔
پاکستان کے محب وطن باصلاحیت ووٹرز کو سیاسی انتخابی مافیا کے خلاف جماعت اسلامی کے سنگ جدوجہد کرنا ہو گی۔لیاقت بلوچ نے مامونکانجن میں میاں شوکت سیڈ، سبزیات،بریڈنگ ٹنل فارمنگ کے وزٹ کے موقع پر کہا کہ پسماندہ علاقہ میں زراعت کی ترقی اور قومی محاذ پر شاندار ،قابل فخر اور قومی فرض اداکیا جا رہا ہے۔ شاندار منصوبہ اور کام کی دیوانگی ثبوت ہے کہ قومی زرعی پالیسی درست ہو جائے تو پاکستان ہر اعتبار سے خودکفیل ہو جائے گا۔
