کراچی(رپورٹنگ آن لائن)وزیراعلی سندھ سید مراد علی شاہ نے صحافیوں کے خلاف جرائم میں استثنی کے خاتمے کے عالمی دن پر پیغام میں کہا ہے کہ آزاد صحافت جمہوریت کی بنیاد ہے،آزاد میڈیا کے لیے محفوظ ماحول پیدا کرنا ریاست کی بنیادی ذمہ داری ہے۔صحافیوں پر حملے سماج کے ضمیر پر وار ہیں۔
انہوں نے کہا کہ پیپلز پارٹی حکومت آزادی اظہار کے تحفظ کے لیے پرعزم ہے۔سندھ پہلا صوبہ ہے جہاں صحافیوں کے تحفظ کا جامع قانون نافذ ہے۔سندھ کمیشن فار پروٹیکشن آف جرنلسٹس عملی و مثر کردار ادا کر رہا ہے۔صحافیوں کے تحفظ کے لیے ٹھوس اور مثر اقدامات کیے جا رہے ہیں۔انہوں نے کہا کہ ڈیجیٹل دنیا میں صحافیوں کے تحفظ کے لیے قانون سازی وقت کی ضرورت ہے۔
آزادی صحافت کے بغیر کوئی معاشرہ مکمل نہیں ہو سکتا، وزیراعلی سندھ نے کہا کہ صحافیوں پر حملوں میں ملوث عناصر کو ہرگز رعایت نہیں دی جائے گی۔نفرت انگیز مہمات اور آن لائن ہراسانی کو روکنے کے لیے مربوط حکمتِ عملی بنا رہے ہیں۔آزاد، محفوظ اور بااعتماد میڈیا کے بغیر جمہوریت کا تصور نامکمل ہے۔
