لاہور (رپورٹنگ آن لائن) گورنر پنجاب سے وفاقی وزیر داخلہ بر یگیڈیئر (ر) اعجاز شاہ کی ملاقات اس موقع پر گورنر پنجاب چوہدری محمدسرور نے کہا کہ آئینی مدت پوری ہونے سے ایک منٹ بھی پہلے حکومت کہیں جانیوالی نہیں ۔پارلیمنٹ کے اندر ناکام ہونیوالی اپوزیشن اب باہر بھی ناکام ہی ہوگی۔
تفصیلات کے مطابق گور نر پنجاب چوہدری محمدسرور سے وفاقی وزیر داخلہ بر یگیڈیئر (ر) اعجاز شاہ نے گور نر ہاؤ س لاہور میں ملاقات کی جس میں سیاسی اور حکومتی امور سمیت دیگر ایشوز کے بارے میں بات چیت کی گئی۔
گورنر پنجاب چوہدری محمدسرورنے ملاقات کے دوران گفتگو کرتے ہوئے کہا کہ فیٹف کے لیے قانون سازی میں رکاوٹیں ڈالنے والی اپوزیشن ایکسپوز ہوچکی ہے اور عوام بھی اپوزیشن نہیں بلکہ حکومت کیساتھ کھڑے ہیں اس لیے کسی اے پی سی سے حکومت کو کوئی خطر ہ ہے اور نہ ہی حکومت کسی اے پی سی کے دباؤ میں آئے گی بلکہ ہم متحد ہوکر ملک وقوم کی خدمت کا مشن جاری رکھیں گے۔ اُنہوں نے کہا کہ وزیرا عظم عمران خان صرف ملک وقوم کے مفاد کی بات کرتے ہیں جبکہ اپوزیشن جماعتوں کے اپنے اپنے سیاسی مفادات ہیں ۔
اُنہوں نے کہا کہ پانچ سال آئینی مدت پوری کر نا تحر یک انصاف کا جمہوری اور آئینی حق ہے اس لیے عام انتخابات 2023ء میں ہی ہوں گے اور مخالفین کو سڑکوں پر آنے کی بجائے ان انتخابات کا انتظار کر نا چاہیے۔گورنر نے کہا کہ احتساب ملک وقوم کی ترقی اور خوشحالی کے لیے لازم ہوچکا ہے ۔ اُنہوں نے کہا کہ فیٹف کے لیے قانون سازی حکومت کی بڑی کامیابی ہے ۔
وفاقی وزیر داخلہ بر یگیڈیئر(ر) اعجاز شاہ نے کہا حکومت ملک میں شفافیات اور بلاتفر یق احتساب کو یقینی بنا رہی ہے۔ اُنہوں نے کہا کہ پہلی بار ملکی اداروں میں اصلاحات ہو رہی ہیں ۔ اُنہوں نے کہا کہ عوام نے ہمیں پانچ سال حکومت کرنے کا مینڈ یٹ دیا ہے اور انشاء اللہ حکومت اپنی آئینی مدت پوری کر ے گی
