شہباز اکمل جندران۔۔۔
کورونا وائرس ختم ہوگیا یا مریضوں نے مہنگے پرائیویٹ ہسپتالوں کا رخ کرنا چھوڑ دیا۔پنجاب میں کورونا وائرس سے متاثرہ کووڈ 19کا علاج کرنے والے پرائیویٹ ہسپتالوں کے متعلقہ واڈز اور آئی سی یو خالی ہوگئے ہیں۔جبکہ کووڈ کے مریضوں کے لیے مختص کردہ وینٹی لیٹر بھی فارغ پڑے ہیں۔
پنجاب کے 12شہروں میں مجموعی طورپر 74پرائیویٹ ہسپتالوں میں کورونا وائرس سے متاثرہ کووڈ19کے مریضوں کے لیے کل ایک ہزار371بیڈ مختص کئے گئے۔اعدادوشمارکے مطابق لاہورمیں 32، راولپنڈی میں 8، گوجرانوالہ میں 5،سرگودھا میں 5،ملتان میں 8 ،فیصل آبادمیں 10، لودھراں میں ایک،شیخوپورہ میں ایک،قصورمیں 2 ،نارووال میں ایک ،رحیم یارخان میں ایک اور سیالکوٹ میں بھی ایک ہسپتال کے بیڈز کووڈ 19کے مریضوں کے لیے مختص کئے گئے۔
پنجاب ہیلتھ کئیر کمیشن کی فراہم کردہ تحریری معلومات کے مطابق 19جولائی کو پرائیویٹ ہسپتالوںکے آئسولیشن وارڈز میں 1371بیڈز پر کووڈ 19کے محض56 مریض تھے۔جبکہ 1315بیڈ خالی تھے۔ اسی طرح ان پرائیویٹ 74ہسپتالوں میں مجموعی طورپر کووڈ 19کے مریضوں کے لیے قائم کئے جانے والے آئی سی یوز میں 19جولائی کو مجموعی طورپر729بیڈز میں سے 679بیڈز خالی رہے۔اور صرف 50بیڈز پر مریض تھے۔
اسی طرح صوبے کے ان 12شہروں کے 74پرائیویٹ ہسپتالوں میں مجموعی طورپر 485وینٹی لیٹرز میں سے کووڈ19کے مریضوں کے لیے 227مختص کئے گئے اور 19جولائی کے پی ایچ سی سی کے اعدادوشمار کے مطابق صرف 10مریض وینٹی لیٹرز پر تھے۔بقیہ 217وینٹی لیٹرزفارغ تھے۔
21جون کے سرکاری اعدادشما ر کے مطابق ملک میں اب بھی کووڈ 19کے 2لاکھ 66ہزار جبکہ پنجاب میں 90ہزار 4سو مریض ہیں۔
تاہم پنجاب ہیلتھ کئیر کمیشن کی طرف سے تحریری طورپر فراہم کئے جانے والے ان اعدادشمار کو درست تسلیم کیا جائے تو صوبے میں صورتحال بہت اچھی اور امیدافزا ہے اور وائرس کم و بیش دم توڑنے کو ہے۔
