ممبئی(رپورٹنگ آن لائن)بالی وڈ ہدایتکار اور فلم ساز کرن جوہر نے اپنی نسوانی چال ڈھال اور اس میں تبدیلی کیلئے کی گئی جدوجہد سے متعلق حیران کن انکشاف کیا ہے۔ کرن جوہر حال ہی میں ایک انٹرویو میں شریک ہوئے جس دوران انہوں نے میزبان ثانیہ مرزا کے ساتھ سنگل پیرنٹنگ سمیت اپنے زندگی کے مختلف اتار چڑھا پر بات کی۔دوران شو کرن جوہر نے انکشاف کیا کہ1989 میں میری عمر 15 سال تھی.
اس عمر میں جب لڑکے سپورٹس کھیلتے ہیں میں اس کے برعکس نت نئی چیزیں سیکھنے کا شوقین تھا، اسی وجہ سے مختلف کورسز کرتا رہتا تھا، میں نے ان دنوں فرانسیسی زبان سیکھنے کے ساتھ ساتھ کوکنگ، فلاور اینڈ فروٹ ارینجمنٹ سمیت امپورٹ ایکسپورٹ کے کورسز کیے۔کرن جوہر کے مطابق مجھے اپنی سکول لائف میں تقاریر اور ٹیبلو کا شوق تھا جس کیلئے میں پبلک اسپیکنگ سیکھ رہا تھا، اسی دوران میرے کوچ میرے پاس آئے اور انہوں نے بتایا کہ میں ایک بہترین سٹوڈنٹ ہوں، بہت اچھی گفتگو کرتا ہوں لیکن میری گفتگو کا انداز لڑکیوں کی طرح ہے، میری چال ڈھال حتی کہ آواز بھی لڑکیوں کی طرح ہے ۔انہوں نے مجھے بتایا کہ یہ معاشرہ بہت مشکل ہے.
مستقبل میں اس انداز گفتگو سے میرے لیے مشکل کھڑی ہوسکتی ہے، جب تک میں ایک مرد کے انداز میں گفتگو نہیں کرتا، میں اعتماد کے ساتھ اس معاشرے میں نہیں رہ سکتا، اسی دوران کوچ نے مجھے مدد کی پیشکش کی۔کرن جوہر کے مطابق اس کے بعد میں نے 3سال تک اپنے کوچ اور ان کی بیگم کے گھر جاکر ان سے ہفتے میں 3دن 2گھنٹے کی کلاسز لیں، اس دوران میں نے مردوں کی طرح بات کرنا اور چلنا سیکھا، میں نے اس کلاس کا ذکر اپنے والد سے بھی نہیں کیاکیوں کہ خوفزدہ تھا اور نہیں چاہتا تھا وہ مجھ سے سوالات کریں، میرے والد کوفرق نہیں پڑتا تھا کہ میں کیسے چلتا ہوں یا بات کرتا ہوں ، میں ان کے سامنے ڈانس بھی کرتا تھا تو وہ فخر محسوس کرتے تھے لہٰذا والد کو یہی بتایا کہ میں کمپیورٹر کلاس لے رہا ہوں اور ان سے لی گئی کمپیوٹر کلاس کی فیس کوچ کو دیتا رہا۔
