شہباز اکمل جندران۔۔۔
سینیرسپیشل جج اینٹی کرپشن لاہور صہیب احمد رومی نے بلال حسین بنام سرکار نامی مقدمے کی سماعت کے دوران ڈائیریکٹر جنرل اینٹی کرپشن پنجاب کو ذہنی طور پر ناپختہ اور نان پروفیشنل رویئے کا حامل قرار دیا ہے۔
عدالتی فیصلے میں بیان کیا گیا ہے کہ دوران سماعت بعض نامعلوم افراد روسٹرم پر دکھائی دیئے پوچھنے پر ان میں سے بعض عدالت سے فوری نکل گئے جبکہ دیگر نے اپنا تعارف رانا ابرار سب انسپکٹر، محمد زمان سے ایس آئی، نامی حسین کانسٹیبل اور مراتب علی ڈرائیور کے طورپر بیان کیا۔
جب ان سے پوچھا گیا کہ وہ روسٹرم پر کیوں دکھائی دے رہے ہیں تو انہوں نے بتایا کہ وہ زیر سماعت کیس کے حوالے سے آئے ہیں۔لیکن جب ان سے پوچھا گیا کہ ان کا کیس سے کیا تعلق ہے تو وہ کوئی جواب نہ دے سکے۔
عدالت نے اپنے آرڈر میں بیان کیا کہ ڈی جی اینٹی کرپشن نے ان بندوں کو عدالت پر دباو ڈالنے کے لئے یہاں بھیجا ہے۔اور عدالت ایسے حربوں سے پریشرائزڈ نہیں ہوگی۔
عدالت نے لکھا کہ ڈی جی اینٹی کرپشن کے اس عمل سے ان کی ذہنی ناپختگی اور غیر پروفیشنل رویہ ظاہر ہوتا ہے۔
عدالت نے اہلکاروں کو وارننگ نوٹس جاری کرتے ہوئے مستقبل میں ایسے افعال سے باز رہنے اور ڈی جی اینٹی کرپشن کو عدالتی ڈیکورم کا خیال رکھنے کی تحریری ہدایات جاری کرتےہوئے معاملے سے رجسٹرار لاہور کو بھی آگاہ کردیا ہے۔
