کراچی (ر پورٹنگ آن لائن)انٹر بینک اور مقامی اوپن کرنسی مارکیٹ میں ایک ہفتے کے دوران ڈالر کے مقابلے پاکستانی روپیہ کی قدر میں گراوٹ کا رجحان برقرار رہا ۔فاریکس ایسوسی ایشن آف پاکستا ن کی رپورٹ کے مطابق گذشتہ ایک ہفتے کے دوران انٹر بینک میں روپے کے مقابلے ڈالر کی قدر میں85پیسے کا اضافہ ہوا جس سے ڈالر کی قیمت خرید 165.95روپے سے بڑھ کر166.90روپے اور قیمت فروخت166.15روپے سے بڑھ کر167روپے پر جا پہنچی اسی طرح مقامی اوپن کرنسی مارکیٹ میں ڈالر1روپے مہنگا ہو گیا جس سے ڈالر کی قیمت خرید 166.20روپے سے بڑھ کر167.30روپے اور قیمت فروخت166.60روپے سے بڑھ کر167.60روپے پر جا پہنچی ۔
فاریکس رپورٹ کے مطابق زیر تبصرہ مدت میں یورو اور برطانوی پونڈ کی قدر میں بالترتیب 2روپے اور2.70روپے کا ریکارڈ اضافہ ہوا جس سے یورو کی قیمت خرید 195روپے سے بڑھ کر197.50روپے اور قیمت فروخت197روپے سے بڑھ کر199روپے کی بلند سطح پر جا پہنچی اسی طرح برطانوی پونڈ کی قیمت خرید227.30روپے سے بڑھ کر230.50روپے اور قیمت فروخت229.30روپے سے بڑھ کر232روپے ہو گئی ۔فاریکس رپورٹ کے مطابق ہفتہ کو مقامی اوپن کرنسی مارکیٹ میں ڈالر کی قدر میں 10پیسے ،یورو کی قدر میں30پیسے کی کمی واقع ہوئی جبکہ برطانوی پونڈ20پیسے مہنگا ہو گیا
