لاہور (رپورٹنگ آن لائن) سابق وفاقی وزیر فواد چوہدری نے کہا ہے کہ پاکستان کے لیے ڈائیلاگ ہی واحد حل ہے، اس کے لیے آصف زرداری، نواز شریف اور شہباز شریف کے پاس جائیں گے،پی ٹی آئی کو سندھ میں ویلکم کیا گیا، بلاول بھٹو میں ذوالفقار علی بھٹو کی سیاست کی جھلک نظر آئی۔
لاہور بار ایسوسی ایشن کے انتخابات کے موقع پر میڈیا سے گفتگو کرتے ہوئے انہوں نے کہا کہ لاہور بار ایشیاء کی سب سے بڑی بار ہے۔ یہاں ہر سال وکلاء کے انتخابات ہوتے ہیں جو ایک جمہوری طریقہ کار ہے۔ وکلاء ہمیشہ قانون کی سربلندی کے لیے کوشاں رہتے ہیں۔فواد چوہدری نے کہا کہ جس طرح دنیا کے دیگر ممالک میں انتخابات ہوتے ہیں اسی طرح پاکستان میں بھی انتخابات ہونے چاہئیں۔ انہوں نے کہا کہ پیپلز پارٹی نے گزشتہ روز سندھ میں تحریک انصاف کو ویلکم کیا جس سے اچھا تاثر گیا۔
وزیر اعلی خیبرپختونخوا کو بھی سندھ حکومت کی جانب سے ویلکم کیا گیا۔ بلاول بھٹو کی سیاست میں ذوالفقار علی بھٹو کی سیاست کی جھلک نظر آئی۔سابق وفاقی وزیر نے کہا کہ سیاسی جماعتوں کے درمیان ڈائیلاگ ہونا چاہیے کیونکہ پاکستان کو آگے بڑھانے کے لیے مذاکرات ہی واحد حل ہیں۔آصف علی زرداری، نواز شریف اور شہباز شریف کے پاس جائیں گے اور تمام جماعتوں کے مل بیٹھنے سے معاملات ٹھیک ہوں گے۔فواد چوہدری نے تحریک انصاف کی قید خواتین کے حوالے سے غور و فکر کی ضرورت پر زور دیا اور کہا کہ جو سزا یافتہ خواتین ابھی سرنڈر نہیں کر سکیں، ان کی سزائیں سسپینڈ کی جانی چاہئیں ۔
خیبرپختونخوا کی صورتحال پر گفتگو کرتے ہوئے انہوں نے کہا کہ صوبے میں دہشت گردی کے حوالے سے تحریک انصاف کو بہتر علم ہے کہ کیا ہو رہا ہے کیونکہ تحریک انصاف تیسری مرتبہ وہاں سے منتخب ہوئی ہے۔ ان کا کہنا تھا کہ خیبرپختونخوا کے مسائل کا حل تحریک انصاف کو بہتر معلوم ہے اور کے پی کے کو کس طرح ٹھیک کرنا ہے، یہ بات تحریک انصاف سے بہتر کوئی نہیں جانتا۔
