لندن( رپورٹنگ آن لائن ) سماجی کارکن اور نوبل انعام یافتہ ملالہ یوسفزئی نے کہا ہے کہ پاکستان کے روشن مستقبل کےلئے بہت پرامید ہوں، نوجوان جدید علوم کے ذریعے وطن کی ترقی کےلئے پرجوش انداز میں کام کر رہے ہیں۔
ملالہ یوسفزئی نے لندن میں ورلڈ ایجوکیشن فورم میں خطاب کے بعد نجی ٹی وی سے گفتگو کرتے ہوئے کہا کہ ترقی کے سفر میں خواتین کا کردار نہایت اہم ہے۔ملالہ نے کانفرنس میں فلسطین،لبنان اور افغانستان میں لڑکیوں کی تعلیم کی صورتحال پر بھی گفتگو کی۔
ان کا کہنا تھا کہ فلسطینی طالبات اپنے مسائل کو سمجھتی ہیں، ان کے پاس ان کے حل بھی موجود ہیں۔ افغانستان میں لڑکیاں چھپ کر تعلیم حاصل کرنے کی کوشش کر رہی ہیں۔ملالہ نے طلبہ کے ساتھ ایک گول میز اجلاس میں بھی شرکت کی اور کوئز مقابلے میں حصہ بھی لیا،کانفرنس میں پنجاب اور کے پی کے وزرائے تعلیم بھی شریک تھے۔اس موقع پر انہوں نے کہا کہ پاکستان کے روشن مستقبل کے لیے بہت پرامید ہوں، نوجوان جدید علوم کے ذریعے وطن کی ترقی کےلئے پرجوش انداز میں کام کر رہے ہیں۔
