نارووال ( رپورٹنگ آن لائن)وفاقی وزیر منصوبہ بندی ،ترقی و خصوصی اقدامات احسن اقبال نے کہا ہے کہ پاکستان امن کا خواہاں ہے مگر اسے ہماری کمزوری نہ سمجھا جائے۔
ان خیالات کا اظہار انہوں نے مسیحی کمیونٹی کی ایک روزہ دعائیہ تقریب سے خطاب کرتے ہوئے کیا۔احسن اقبال نے کہا کہ ملکی ترقی مضبوط اداروں اور قومی وحدت سے مشروط ہے،شہدا ء ہماری شان اور ماتھے کا جھومر ہیں،دشمنانِ پاکستان کو عبرت کا نشان بنائیں گے۔دعائیہ تقریب سے خطاب کرتے ہوئے صوبائی وزیر اقلیتی امور رمیش سنگھ اروڑہ نے کہا کہ پنجاب حکومت اقلیتی برادری کی فلاح کیلئے پرعزم ہے.
بین المذاہب ہم آہنگی کیلئے ایسی تقریبات موثر کردار ادا کرتی ہیں۔ دعائیہ تقریب میں پاسٹر انور فضل نے پاک فوج، عدلیہ اور ریاستی اداروں،ملک و قوم کی سلامتی، ترقی اور خوشحالی اور وزیراعلی پنجاب مریم نواز کی صحتیابی کیلئے خصوصی دعائیں کیں۔ مسیحی کمیونٹی نے اسلام آباد کچہری دھماکے کی شدید مذمت کی۔
